圖片：Sky Sports

到落筆呢個時間，曼聯並無發佈任何有關摩連奴上任領隊嘅消息(編按：摩連奴已於香港時間週五正式落實成為曼聯領隊)，但Skysports喺香港時間星期四晚就報導摩連奴出門時著靚西裝去倫敦某間酒店同曼聯高層簽約，返屋企時就拎住一疊文件同紅酒。應該好事近啦。連前曼聯中堅李奧費迪南都寫左千字文恭喜「老豆」上任，唔會空炮啦掛？今朝睇咗《香港01》講過摩連奴嘅三年必衰宿命，其實無話唔啱嘅，只係今次摩連奴最大挑戰，除咗突破以前嘅自己之外，就係重建曼聯皇朝。

圖片：The Guardian

呢幾日成日聽啲名宿講曼聯傳統風格，到底即係乜？不外乎係強橫嘅進攻能力，打不死精神，同埋輝煌嘅主場成績。後兩者其實唔難做到。不過摩連奴係一個非常實際嘅領隊，需要進攻時佢唔會手軟，不過有啲比賽又可以場場1-0魚生粥了事。曼聯球迷又未好似皇馬球迷咁痴線，稍為守下即噓。不過曼聯以卜比sir為首嘅元老會唔會支持就好難講。

圖片：The Guardian

曼聯同皇馬一樣都有好濃厚嘅大佬文化，邊個喺曼聯歷史有地位就有政治能量，你喺出面幾有江湖地位都無用。莫耶斯當年喺曼聯無地位之餘，仲叫李奧費迪南睇帶學愛華頓中堅積基卡學防守，咁就搞唔掂個更衣室。摩佬當然比莫耶斯有魅力啦，不過先前喺皇馬同車路士都唔可以駕馭更衣室，今次進軍紅魔，本身得唔到曼聯高層充份支持嘅佢，點樣建立喺曼聯嘅地位都係好關鍵。

圖片：Sky Sports

曼聯無論高層定球迷都好，都有共識希望揾到一個可以長旗坐正嘅領隊令球隊可以穩定發展，呢個都係點解摩連奴上任嘅反應會比莫耶斯同雲高爾咁兩極嘅原因。費格遜退休已經三年，而曼聯仲未可以走出費格遜嘅陰影。摩連奴將會係曼聯後費格遜時期第三位領隊，而摩連奴喺曼聯成功定失敗，就影響曼聯往後嘅發展，所以摩佬今次執教壓力比以往任何一次都大。

李羅渣(facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、網台節目主持、Menclub足球文章作家、演

員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。