{ SKIP }
文:李羅渣  
POSTED ON 30 Jul 2016

圖片:thesun


普巴天價愛回家講到似層層,尋日天空體育就話普巴已經喺邁亞密做緊體測,今日就宣佈埋返曼聯。祖雲達斯雖然有一定財力,不過飛來橫財一定身痕,佢哋都用咗9000萬歐元同拿玻里買咗希古恩,頂替俾皇馬回購嘅莫拉達。加埋同樣來自阿根廷嘅新星戴巴拿,免費加盟嘅丹尼爾艾維斯、羅馬嘅波斯尼亞中場比真歷,祖記真係粒粒皆星,有幾位仲要係意甲競爭對手嘅主力,新球季祖雲達斯胃口都可以話幾大。


圖片:theguardian


希古恩上屆意甲威到震,單季入咗36球破埋意甲歷史紀錄,睇數字一定可以提供到同莫拉達咁上下嘅產量俾祖記,加埋祖雲達斯條黃金中場真係唔休無供應。不過點解最後埋單個價要成9000萬鎊,就真係要問返祖雲達斯同拿夏里個體育總監啦。始終希古恩同拿玻里之係得返一年約,而且又年紀唔細,咁都出咁高價,明顯係為求斷主要競爭對手一臂不惜一切,想壟斷多幾年意甲囉,買埋比真歷都係咁解咋嘛,當然歐聯就一定係祖記另一大目標啦。


圖片:goal.com


成單交易邊個最唔開心?拿玻里當然係啦,話就話9000萬歐元代代平安,不過報導話祖記會分兩期找數,即係拿玻里今個夏天都唔係特別多彈藥買人,諗下買邊個頂希古恩當然夠煩,仲要諗計說服打完歐洲國家盃人氣急升嘅咸錫都係艱巨任務,唔止阿仙奴同車路士想搵佢過檔,連德甲班霸拜仁慕尼黑都同佢傾過計,如果唔好彩連咸錫都走埋,意甲真係祖記玩晒,拿玻里唔愁就有鬼。另外最唔開心就肯定係阿仙奴啦,特別係球迷,出到基奧特同5000萬歐元都買唔到,一個球員險簽兩次,塊面都唔知擺去邊。


圖片:juventus


講開祖記,今日四點佢哋嚟咗香港大家都知啦,今日四點佢哋就會同南華打友賽,有飛你梗係可以入場啦,無飛就真係要搵下乜嘢台有直播啦,因為唔多見有乜台話會播。而入場嘅朋友真係飲多啲水,天時暑熱唔好搞到中暑,注意身體啦。


李羅渣 (facebook page: https://www.facebook.com/leerogerfcpage/) \

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達,最想成為有些少生活品味嘅偽文青。

為防止未成年用戶接觸「不當內容」,近期英國正式實施網絡安全法(Online Safety Act),要求境內所有提供成人內容嘅網站及應用程式,必需加入強而有效嘅年齡驗證機制,唔再好似以往咁撳一下「我已滿18歲」就得。現 ...
hobby
【電玩】英國新法防未成年接觸不當內容 玩家用《死亡擱淺》角色破解驗證系統
28 Jul 2025
繼《Helldivers II(絕地戰兵2)》宣布登陸Xbox Series S/X後,PlayStation近日一份招聘廣告顯示,佢哋正計劃將更多自家遊戲拓展到其他平台。或者在不久嘅將來,玩家們能夠從Xbox及Switch 2玩到PlayStation嘅招牌作 ...
hobby
【電玩】PlayStation招聘多平台高級總監 計劃將旗下更多遊戲移植到Xbox及Switch 2
28 Jul 2025