圖片：eurosports

哥迪奧拿入主曼城後引入控球地面進攻打法，唔只中前場要傳得控得，即使係門將都要有咁上下腳法。上季傳送率只有五成左右，哥帥寧願用卡巴尼路都唔用佢。愛華頓放棄搵佢加盟之後，意甲拖連奴就想借用呢位英格蘭國門，曼城仲會負擔75﹪人工添。

圖片：telegraph

BBC報導，已經同英格蘭報到嘅祖赫特得到足總許可可以離隊去意大利進行體檢，而曼城同拖連奴都答應會共負擔祖赫特嘅人工，當然曼城就俾大份啲啦。祖赫特係近年少有當打之年出國搵食嘅英格蘭球員，對佢本人嚟講體會多啲英超以外嘅比賽經驗都唔係壞事，當然最重要係祖赫特可以打正選保持狀態啦，所以消息話曼城為咗成人之美，無再要求拖連奴俾借用費。

圖片：premierleag

至於點解哥帥唔用祖赫特，上次講轉會窗死線嘅文章都有提，主要因為腳法唔好，而傳球成功率更只有50﹪左右，比堯哥帥用過嘅紐亞同域陀華迪斯都要低。哥帥同時要求門將要喺危險情況下交波俾隊友創造轉守為攻嘅機會，呢方面祖赫特都唔可以委以重任。所以哥帥呢幾場情願用撲救一向麻麻嘅卡巴尼路打正選，對新特蘭嘅比賽，呢位阿根廷門將無令哥帥失望，傳球成功率高達八成。只係卡巴尼路嘅撲救表現太唔理想，做Plan B都還好，如果要長期坐正，另覓人選先係上策。

圖片：express

祖赫特嘅代替品，就係巴塞嘅智利門將巴禾，相信除咗紐亞同域陀華迪斯，都無邊個門將係哥帥睇得上眼。巴禾打開巴塞，同哥帥戰術一拍即合，適應上唔會有乜大問題。更誇張係原來巴禾喺上季西甲有5場比賽傳送率有100﹪。哥帥當然希望佢可以交出相同表現俾曼城啦，撲救嚟講又比卡巴尼路穩定，而且喺巴塞大把大賽經驗，對於一直以歐聯冠軍為目標嘅曼城，巴禾絕對係曼城一號門將最佳人選。

李羅渣(facebook page: https://www.facebook.) 

八十後、忠實曼聯球迷、唔忠實嘅愛華頓球迷、前網台節目主持、

由懶到出汁變成泰拳愛好者 

除咗足球最鍾意就係睇戲、睇書、飲兩杯 

唔求發大達，最想成為有些少生活品味嘅偽文青。