大家入咗場睇《真．哥斯拉》未呢？睇咗嘅你又知唔知其實今次呢隻哥斯拉，身高有成118.5m，係歷年咁多隻哥斯拉中最大嘅呢？118.5m有幾大，就係如果係按80:1嘅比例縮小，都有成1.5米高!

咁點解我要用80:1呢個比例呢？就係因為佢出咗隻80:1嘅哥斯拉呀！

其實呢隻巨型哥斯拉已經係再販售嘅產品，第一次出係2011年。咁當時就當然唔會係用《真哥斯拉》嘅新設定，所以就用上1989年劇場版《哥斯拉vs碧奧蘭蒂》(日文名:ゴジラvsビオランテ, 當年中文譯名係戰龍哥斯拉之真假對決)中嘅設定，即係80米高。換言之，按80:1嘅比例縮細之後就啱啱好一米高啦！

講返隻Figure本身，主要以軟膠製作，成隻分成60個零件，玩家需要自行組裝。而且所有部件都係未上色，換言之你都要自己落手落腳上埋，成米高要上色真係諗起都覺辛苦。而且仲要賣成15萬Yen，即係超過萬一銀港紙…我冇嘢講啦。