圖片:101greatgoals

近日未有班落嘅朗拿甸奴宣布重返巴塞！不過未有班落嘅佢梗係唔係落場啦，而係擔任球會喺美國嘅宣傳大使。我哋間唔中都會聽到細哨嘅消息，例如射咗球好鬼靚嘅世界波，唔知點樣插花過人之類，咁事實上，朗拿甸奴都真係令好多人投入足球世界，包括小弟。

圖片:BBC

仲記得02世界盃八強巴西對英格蘭，因為場波喺日本踢嘅關係，睇世界盃就變咗下晝睇，嗰陣成班同學去咗個有有線直播嘅同學屋企一齊睇，見到細哨個罰球不偏不移地笠死施文，我哋成班同學睇到嘩嘩聲。而我因為呢場波而開始睇波，而呢屆世界盃就將當時22歲嘅佢由巴黎聖日耳門帶到巴塞隆那。

圖片:dailymail

喺巴塞五個球季，上陣咗207場入咗94球，當時巴塞陣容比而家更得人驚，亨利、伊度奧、美斯、沙維⋯俾你守都唔知守邊個好。2005年球季嘅國家打比，個人表演式入兩球協助巴塞3-0擊敗皇馬，唔止卡斯拿斯O晒嘴，連主場皇馬球迷都無再噓佢，更為佢嘅表現鼓掌，甚至馬勒當拿對佢一樣讚口不絕。喺25歲時細哨已經贏晒一個世界級球星應該贏嘅獎盃都贏晒。

圖片:fourfourtwo

不過朗拿甸奴嘅高峰好快就過咗，不過都係人之常情，廿零歲去到咁高嘅位置，真係會失去上進嘅動力。球場上嘅朗拿甸奴唔會將得失睇得太重，到而家36歲仍然打算繼續踢波就可見一二，有時各類型嘅明星賽都有邀請細哨參加，我哋仍然可以睇到佢開心地踢波。細哨暫時未簽任何球會，不過佢之前講過下半年會復出，相信我哋好快又可以間中睇到朗拿甸奴嘅神奇表現。

李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。