突發? 井上雄彥籃球新作?

文：MenClub 魏文青　　
POSTED ON 20 Sep 2016

如果我話井上雄彥嘅《Slam Dunk》史上最出色嘅真實系籃球漫畫，相信都冇人會有異議(順提一帶，《黑子的籃球》係超級系黎)。而本身都非常熱愛籃球嘅井上老師一直都有繼續畫籃球漫畫——例如以輪椅籃球為主題嘅《REAL》咁。不過近日井上老師嘅個人網站就出現咗一張新插畫，唔同老師又有新作？
圖片：http://www.itplanning.co.jp/
其實呢幅係井上老師與《朝日新聞》合作，與日本職業籃球員訪談報導嘅插畫黎。畫中人叫岸本隆一，今年26歲，出身自日本沖繩，由2013年開始效力日本B-League(日本職業籃球聯賽，Just in case你想知，係冇「A League」嘅)球隊琉球Golden Kings，司職後衛。新人球季協助球隊打入總決賽，獨力獲得34分成為比賽MVP，係日本籃球嘅新星！

除咗佢之外，井上老師亦先後同多位職業球員會面，亦都有為佢哋畫插畫。對於外界有傳老師會以岸本嘅故事創作藍球新作，文青就未搵到日本有相關報導。如果搵到進一步情報，我再同大家跟進。
圖片：https://twitter.com/inouetake
不過呢，其實井上老師仲有《浪客行》同《REAL》兩個坑未填，個人相信老師短期內都唔會貿然再開新坑嘞。