講起史篤城，唔知大家有乜印象？仲停留喺戴納手榴彈時代？其實自從前三年前曼聯隊長馬克曉士執教後，球隊就銳意由體力工兵型球隊，轉型成為講球技術同組織嘅球隊，三年黎其實人腳都執到八八九九。不過今季起步真係幾差，頭5場只得1和5負仲慘過新特蘭，不過10月起史篤城就即時彈起打出3勝1和嘅好成績。其實呢隊波係值得有更加好嘅成績，不如我哋又簡單地回顧下升上英超後到而家嘅史篤城呀。

要講史篤城升上英超嘅重要人物，點可以少得前後執教達10年之久嘅東尼佩利斯。如果你係有長期留意香港足球嘅朋友就一定識佢，因為佢80年代嚟過香港踢本地班霸愉園——一季咁多。佢喺再次回歸史篤城嘅第二季，就已經帶領史篤城以英冠亞軍身份升上英超，話佢係史篤城嘅英雄一啲都唔過份。喺佢帶領之下嘅史篤城從未試過喺尾六位完成聯賽，又曾經帶領過球隊打入足總盃決賽。不過喺2012﹣13球季完咗之後，會方就同佩利斯解約，轉請馬克曉士接任。可能你會覺得球會忘恩負義，拋棄糟糠，不過球隊要更上一層樓，換領隊在所難免，當年修咸頓一樣試過。

佩利斯以體力化同擅打高空攻勢見識，如果史篤城嘅目標係「以不過不失成績留喺英超」嘅，其實係OK嘅。不過可以帶領球隊升班、留喺英超，又唔代表可以力爭上游，而呢個就係史篤城同佩利斯分道揚鑣，轉聘馬克曉士嘅重要原因。呢位前曼城領隊更重視地面傳送，以直線傳球代替高空攻勢，所以佢就先後由巴塞同國際米蘭購入保贊同沙基利。兩位都係球員響負盛名嘅明日之星，保贊就喺巴塞無出頭，至於沙基利就轉會只有半季就俾文仙尼彈鐘。馬克曉士睇準時機入貨，對史篤城嚟講真係重要收購嚟，你都咪話佢唔醒目。今季仲要買埋祖亞祖做中場指揮官，到而家佢都已經入咗4球同交出兩個助攻，相信球隊控制節奏會更加出色。

曉士執教三季，史篤城都坐穩第9位，對史篤城嚟講而家當然係球會高峰。而史篤城嘅管理都有好清晰嘅路向，並唔會因為一時三刻形勢不順就對領隊「動殺機」。至於曉士，暫時睇到嘅係佢手下嘅史篤城仍然係成長當中，相信佢亦有自己發展球隊嘅大計，只係史篤城會唔會為咗再進化而同曉士分手，就係另一個有趣問題啦。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青