牙買加飛人保特係天字第一號曼聯球迷呢個就公開嘅秘密嚟架啦，有時啲明星表演賽，「閃電俠」都會落場過下波癮。喺田徑場上贏盡所有嘅保特一向有個足球夢，就係希望退役之後可以效力曼聯。近日球壇就有消息，話保特真係「轉戰」球壇，不過就係去咗多蒙特跟操，連多蒙特高層都證實真有其事呀。

咁點解保特唔係去曼聯跟操呢？因為保特同多蒙特嘅贊助商都係Puma，而成件事亦都係Puma 負責拉線嘅。多蒙特CEO華斯克就話出年會安排保特同多蒙特一齊練波，而如果賽程唔係太密，領隊杜慈亦唔會介意。咁到底保特會唔會真係以球員身份加盟多蒙特呢？華斯克就話完全無傾過，仲話保特願意去多蒙特試訓已經覺得相當榮幸。如果保特打前鋒，同奧巴美揚一齊攻堅，其他德甲球隊嘅後衛真係等食塵。

網上就好多人討論佢可以打咩位，常理黎諗就當然係前鋒或者翼鋒，有人仲講笑話佢咁快可以自己助攻俾自己。又有人話佢可以打box to box，因為佢夠快體能又好，可以走上走落，不過box to box需要球賽閱讀能力、位置感、傳球能力等等等等，總之就要攻守兼備，半途出家嘅保特打呢個位就難少少。保特對自己轉型做足球員要求非常高，又充滿自信，佢話自己除咗身體，仲了解任何足球戰術，又話自己控球唔錯，只要曼聯俾佢試訓，曼聯就一定俾5年合約佢咁話。仲話對佢嚟講，效力曼聯先係真正完成佢嘅足球夢，唔知各位曼迷又點睇喇。

運動員退役轉玩其他運動並唔罕見，不過就唔係個個成功。NBA波神米高佐敦第一次退役就去咗伯明翰男爵打咗一季棒球，不過之後就重返NBA繼續建立公牛王朝；前魔術傳奇麥基迪一樣對棒球有興趣，但都係好快就退役；前拜仁慕尼黑左閘利沙拉素就轉打巴西柔術，09年喺里斯本打比賽仲贏過冠軍添；神經刀門將巴夫斯08年開始就轉玩賽車，成績都唔錯。仲有前雲達不來梅門將維澤就去左打WWE，發展都唔錯。保特咁熱愛足球，希望佢真係圓到佢嘅足球夢同時樂在其中啦。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青