有時睇波，除咗支持心愛球隊同欣賞球星精彩嘅技術，球場上有唔少性格巨星都令足球吸引到唔少眼球。佢哋未必好好波，不過場內場外嘅行為都充滿話題性，呢次不如就討論下啲令人哭笑不得嘅球壇癲佬。

1）希基達

你以為紐亞帶起sweeper goalkeeper呢個位置？少年你太年輕了，呢位哥倫比亞門將先係呢個位置嘅老祖宗。一頭長髮加成面鬍鬚令希基達充滿狂野氣質，佢仲係有紀錄以來世界第三入球多嘅門將。不過大家最記得就係佢1995年對英格蘭嘅友賽使出嘅蠍子式救球。而喺1993年時佢曾經捲入一單綁架案，當時佢竟然話自己係足球員，唔清楚有關綁架嘅法律條文。希基達退役後開始擔任門將教練，換個位置繼續足球生命。

2）迪肯尼奧

大家對上一次喺球場見到佢應該係三年前佢執教新特蘭護級成功。教波其實佢就麻麻，不過勝在夠晒激情。球員時代嘅迪肯尼奧無紀律就出晒名，同教練反面、嚴重犯規、唔出席球會訓練、打人乜都齊。最癲係踢緊錫周三時對阿仙奴同基昂打大交再推跌埋球證，結果被罰一萬鎊兼停賽11場。不過佢有時又好君子，2000年效力韋斯咸對愛華頓嘅比賽，對面門將受傷倒地形成空門，迪肯尼奧用雙手接波放棄入球機會，因為咁FIFA仲頒咗個公平競技獎俾佢，成為一時美談。另外迪肯尼奧都係一個著名嘅法西斯主義者，除咗多次用法西斯手勢慶祝入球之外，舊年喺skysport做節目時因為上鏡露出法西斯紋身而被棄用。

3）簡東拿

身為曼聯球迷講癲佬點可以唔講返個曼聯代表先？除咗目空一切咁款嘅慶祝動作，最出名嘅一定係使出穿心腿對水晶宮球迷心口一嘢轟落去嗰幕。不過呢腳令佢有好多手尾跟，仲爭啲退出英格蘭球壇。之後1995﹣96年嘅球季佢喺下半季表現持續出色，幫曼聯後上反超前紐卡素驘到英超冠軍。再之後嗰季完咗之後突然宣布退役，到今日佢都未有交代原因。

4）祖爾巴頓

又一個出晒名嘅麻煩球員。出道於曼城嘅佢都算好波嘅，不過就成日受傷，而佢嘅紀律問題就更加嚇死人，不過呢度篇幅有限我唯有講下佢近年嘅痴線嘢。場內與對方球員發生爭執就最低消費，場外襲擊球迷亦都並非罕見，而早幾年佢被外借去馬賽，當時萬人迷碧咸都喺法甲效力PSG，佢夠膽死話碧咸過氣，仲表示法甲有佢之後碧咸只係第二靚仔嘅英國人；上季效力般尼時球隊驘到英冠冠軍，但般尼竟然唔記得分獎牌俾佢，於是佢喺頒獎儀式大合照時問球迷拎隻吹氣獎盃寸爆球隊，有傳呢個就係巴頓唔跟般尼重返英超嘅導火線。而有關佢嘅最新消息係：同格拉斯哥流浪領隊炒大獲，俾球會禁賽三星期。

5）蘇亞雷斯

上面嗰幾個叻極都係打人，哨牙蘇威呀，佢興咬人，仲由以前喺荷蘭阿積士咬到去英格蘭利物浦，去到南非世界盃都照出口。當時FIFA重罰佢停賽有唔少爭議，我就認為FIFA嘅立場係蘇亞雷斯已經三番四次犯同一樣事所致。至於點解有舖咬人癮，阿蘇次次受訪一係就唔認，一係就講到一舊舊，世界盃嗰時有香港傳媒搵啲行為學家分析下原因添，真係誇張。不過呢位烏拉圭射手去咗巴塞隆那之後都修心養性，冇再咬人之餘，表現仲唔錯添。

6）馬達拉斯

呢個都唔寫，呢篇不如唔好登算。有關馬達拉斯大家最記得嘅，就梗係佢喺2006年世界盃決賽俾施丹用頭撼落心口嗰幕，實情係因為佢對施丹姐姐經出言不遜，所以先畀人兜心口頂落去。而呢個頭鎚間接造就意大利驘走世界盃，搞到施丹球員生涯有個唔完美嘅句號。而喺呢件事之前，馬達拉斯一樣出名係臭馬。打中堅嘅佢一向要腳唔要波，一早係球壇公認殺人王。不過當佢唔茅嘅時候，馬達拉斯都算係一名出色中堅。雖然爸爸奧斯比馬達拉斯喺球圈都叫有頭有面，但由佢年青到正式成為職業球員都無靠過爸爸，只靠一己之力由意乙打到成為國腳，第二次打佩魯賈時仲成為意甲史上單季入球最多嘅中堅。球場以外，馬達拉斯無好似祖爾巴頓咁撩事鬥非，反而係個非常錫老婆同仔女嘅好老公好爸爸。

我知，你又想話我無提呢個無提嗰個呀嘛，大家齊討論下，球壇仲有邊啲癲佬令你印象深刻架啦OK？

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青