首先，利申，我係一個曼迷，雖然稱唔上係「憎」，但對利物浦上上下下都冇咩好感(尤其當佢排名前過曼聯嘅時候)。但如果你問我人生睇過邊場比賽最好睇，我一定會答你係2005年歐聯決賽對AC米蘭嘅「神奇之旅」；如果你問我最鍾意嘅英格蘭球員，我會答你係有神奇隊長之稱嘅「謝四」謝拉特。作為一個曼迷，我對謝拉特有嘅係尊敬：敬佢嘅可以感染全埸嘅熱血(唔準提打拳)、敬佢於關鍵時刻都可以有神奇、頂級、超卓嘅表現(唔準提跣腳)、敬佢十九年為一母會獻盡所有。

謝拉特9歲就加入利記青年軍，1997年11月以17歲之齡簽下職業合約，一年後第一次以一隊成員身份出賽對布力舨流浪，之後該季出賽13次，主要係替代當時受傷嘅紅軍隊長占美列納嘅中場中位置，偶而亦會以右中場身份上陣。但謝拉特曾經講過唔滿意當年嘅表現，話因為太緊張，所以經常失位，而且佢認為自己係一名搶截型防守球員多於攻勢組織者，所以表現唔算突出。

或者就係因為呢個諗法，所以謝拉特整個生涯嘅攔截都非常凶狠——例如喺升上一隊嘅第二季嘅第一場聯賽對同市宿敵愛華頓，佢下半場半途入替科拿，完場前就「成功」拎紅牌被人趕出場。但同時呢種打法亦造就佢往後嘅Box-to-Box打法。都可以話係雙面刃。

到03年，謝拉特接受時任紅軍領隊候利亞任命，從芬蘭後衛希比亞手上接過隊長臀章，從此帶領紅軍南征北討。但因為該季球隊無冠而回，非常失望嘅謝拉特曾經考慮過轉會車路士。幾年後隊長承認當時佢「對球隊進展唔高興」所以「人生首次有轉會嘅念頭」。但最後因為球隊迎來新帥賓尼迪斯，所以謝拉特亦拒絕車仔嘅二千萬合約留隊。

兩年後就係著名嘅「伊斯坦堡奇蹟」。上半賽一開賽，紅軍左閘查奧爾犯規，派路主理自由球傳中，由AC米蘭隊長、當時已經37歲嘅馬甸尼窩利抽入，未夠一分鐘旋即領先。其後整個上半埸，擁有卡卡、舒夫真高、基斯普、加度素、尼斯達、派路、卡富等全名星陣容嘅AC米蘭壓住紅軍黎打，其後由基斯普兩度建功領先3:0。

正常黎講，如果你係紅軍擁躉，睇到呢到就應該熄電視早啲瞓，事實上當時所有人都以為A米會大勝而回。但到下半場54分鐘，神奇隊長就接應懷斯傳中頂入一球，為紅軍反擊揭開序幕。兩分鐘後，上半場後備入替基維爾嘅史米沙遠射建功，紅軍追成2:3，再兩分鐘後，謝拉特殺入禁區被加度素拉跌，球證判罰12碼，由沙比阿朗素主射，但被迪達救出，好在阿朗素快步補射入網，短短六分鐘內紅軍追成3:3。進入加時後波蘭門將杜迪克先救出舒夫真高嘅近距離補射，再於十二碼階段撲出派路及舒夫真高嘅射門，助紅軍以3:2取勝。賽後謝拉特成為賽事最佳球員，同年贏得歐聯年度最佳球員。

效力紅軍多年，謝拉特唯一嘅遺憾相信就係未能奪得英超冠軍。13-14球季，謝四帶領嘅紅軍曾經「無限接近」冠軍，點知於聯賽倒數第三場主場對車路士，謝拉特於自己後場接應回傅時「驚天一跣」，被車仔前鋒丹巴巴亞搶去皮球，再射入首開紀錄，最後紅軍以0:2落敗，失去奪冠主導權，最後以兩分落後曼城只能奪得第二。

14-15球季，謝拉特宣佈於季尾離隊。及後加盟美國大聯盟洛杉磯銀河，簽下18個月合約。最後於2016年宣佈掛靴。