巴西球隊查比高恩斯早前飛往哥倫比亞參加美洲球會盃作客國家體育會嘅首回合賽事時遇上空難，全機71人只有6人生還，當中只有三名球員，令呢隊巴西球壇新力軍由球會高峰直墜谷底。雖然唔係好認識巴西球壇，不過全日都忍唔住留意有關空難嘅最新消息。

查比高恩斯係一間好年青嘅球會，只有43年歷史。近年最巴閉係以5年時間由巴丙升上巴甲，上年就以第14位完成聯賽。今年南美球會盃（級數等同南美州版歐霸盃）四強踢走埋聖羅倫素，晉級對國家體育會絕對係佢哋球會史上嘅頂峰。上兩星期一齊慶祝球會向冠軍進發，今日就忽然陰陽永隔，心情當然悲痛。查比高恩斯部份因為傷患同停賽無隨隊去哥倫比亞嘅球員返咗球會等消息，唔少球會都發官方聲明支持查比高恩斯，皇馬同巴塞集訓前有默哀儀式。又原來其中一位死者係查比高恩斯隊長Cleber Santana效力馬德里體育會時同迪基亞做過隊友，今日迪基亞喺Facebook亦有悼念呢位前隊友。

呢場空難，大家自然諗起令曼聯幾乎解散嘅慕尼黑空難。空難之後曼聯用青年軍同預備組成員勉強完成球季，出事後第一場比賽仲以3-0贏咗錫周三。當時好幾位曼聯嘅明日之星喺空難中喪生，時任領隊畢士比爵士更要留院兩星期，生還嘅球員有部份更因傷要提早退役，直到下一季畢士比爵士復出重整球隊，再加上當時唔少歐洲球會向曼聯主動外借球員，先令曼聯可以更快重新上路，空難後十周年曼聯仲贏埋歐洲冠軍球會盃，係球會首個歐洲賽錦標。查比高恩斯可唔可以好似曼聯咁咬緊牙關重新出發的確令人擔心。

至於本來可以一年內贏晒南美洲兩個重要錦標嘅國家體育會，就向南美洲足協建議將南美球會盃直接頒俾查比高恩斯以作支持。喺生命面前，勝負絕對不重要。雖然一個獎盃而家對查比高恩斯幫助極微，不過國家體育會呢個行為絕對係體育精神最佳嘅體現。我同樣希望各位Gentlemen可以喺呢個艱難時刻，不論你係乜嘢球迷，請以任何形式支持查比高恩斯，你認為微不足道嘅轉profile picture或者like，對死者、死者家屬同生還者都係一份支持，因為你令佢哋感受到自己並非孤單一人，所以千其唔好睇少自己嘅力量。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青