文青有個願望，就係去一個「日本主題樂園Trip」，全程咩都唔做淨係去迪迪尼、富士急、環球影城(USJ)玩到嘔為止。可惜一來未搵到同路人，二黎又冇咩錢，所以一直都係得個諗字！但睇完USJ近排公佈嘅2017新景點之後，我就好想2017可以去到呀！

除咗早排公佈嘅「任天堂」展區，USJ於2017年都會推出名為「Cool Japan」嘅新系列，當中包括各個充滿日本特色——即係動漫、遊戲、音樂——嘅景點。黎緊仲會預先開放比人優先試玩！一齊黎睇下有啲咩啦！

戰國The Real at 大阪城

《戰國The Real at 大阪城》係USJ嘅新舞台表演，顧名思義就係以日本戰國時代為題，相信故事應該有關「日本第一勇士」真田幸村嘅最後一役「大阪城之役」，亦會以投影技術造出「大阪城」等背景。而週邊地區亦會改成戰國時期嘅建築，又會有真田幸村嘅主題食物及商品。表演期為2016年12月16日至2017年3月12日，即係理論上你下個星期就可以去啦！

不過我就唔會咁早去啦。因為由1月13日至6月25日，USJ仲會開放五個新景點。分別以《哥斯拉》、《進擊的巨人》、《名偵探柯南》、《Monster Hunter》同《Evangelion》為主題，幾乎全部都係同體感、4D等等有關。

哥斯拉The Real 4D

《哥斯拉The Real 4D》係4D動感影院，你會化身為地球軍方嘅駕駛員，駕駛戰鬥機由航空母艦起飛對付哥斯拉，應該會充滿逼力！同場仲有哥斯拉發光Figure、零食、以及哥斯拉腳印包畀你使下錢。

進擊的巨人 The Real

雖然今次冇寫「4D」，但其實《進擊的巨人 The Real》又係一個4D影院黎。喺呢到你除咗可以睇到USJ獨有嘅全新《進巨》故事之外，仲有隻15米高嘅「鎧之巨人」畀你影相。

商品方面除咗嘢食同水樽之外，如果你有錢，你仲可以買個立體機體裝置同調查兵團外套、斗蓬添！

名偵探柯南 The Escape

終於唔係齋睇片啦！喺《名偵探柯南 The Escape》入面你要於限時六十分鐘之內同柯南一齊解開謎題、拯救一班被人綁架於演講會中嘅大阪警察，如果唔係啦喎…就會再玩多次先知個結局係咩架啦！

之於商品，大家最有興趣嘅就應該係支發光筆同應該冇麻醉功用嘅麻醉槍手錶。

Monster Hunter The Real

又見到「The Real」，又係一個影院項目。不過今次你唔係做獵人，而係做一個負責運送一班準備去捕獵「嵐龍」嘅獵人嘅飛船船員，點知途中仲遇到另一條「天彗龍」。由於兩條龍都極巨大(嵐龍設定係30米高)，所以影院用咗個43米高嘅螢幕黎播放，又換言之入面嘅所有怪物都會係按1:1比例出現。

咁既然係「芒亨」景點，又點少得貓飯同燒肉呢？

Evangelion XR Ride

今次冇「The Real」，但有「XR Ride」，咁XR Ride係咩黎呢？答案就係以VR(虛擬實景)配上移動裝置，將你帶入第三新東京——仲要係被第三使徒襲擊嘅第三新東京之中！

買嘢方面呢，就繼續有當年搶崩頭嘅初號機爆谷盒、駕駛艙形嘅汽水、NERV iPhone殼、仲可以有你自己被使徒追嘅相添！