首先睇下個盒先。因為呢隻超合金總共由五隻角色組成，砌起咗之後都幾乎有成尺高，所以個盒都唔細。正面就有合咗體嘅美術圖，背面就分別有角色介紹，左右就係分別有幾張漫畫同超合金Logo。

正

背

左

右

打開個外盒仲有個內盒，再拉個發泡膠出黎先見到啲超合金嘅真身。

說明書除咗精美之外仲好重要！你睇埋我一陣試圖將呢幾隻嘢合體你就明點解。

好啦，到五隻角色登場，佢哋分別係胡迪、胡迪隻馬「紅心」、抱抱龍、彈弓狗同火腿。話到明係超合金，每隻都用料十足，非常墜手——尤其當你砌起咗之後——用料大部份係膠、不過有部份部件都用咗金屬，例如胡迪對腳、收埋喺抱抱龍同火腿入面，合體完之後嘅腳掌等等。

就算唔砌埋呢，每隻各自都有啲可動性。例如胡迪嘅雙手可動性非常高，手肘位仲係雙關節(不過其實係因為合體需要)，雙腳就只係髖關節可以稍稍向前郁。順帶一提頂帽係可以除落黎嘅，入面亦有另藏機關。

紅心嘅四隻腳都可以稍為(真係稍為)向後拗，後腰嘅火箭炮可以轉向後——不過就比較似係合體需要而設。

另外胡迪係可以騎上紅心到嘅。紅心個馬鞍有個機關，可以勾住胡迪個後腰，所以坐得都算穩陣。不過因為胡迪對腳冇膝關節、所以騎上去之後兩隻腳會向外叉——不過醉翁之意都不在酒架啦？

彈弓狗真係可以稍為伸長，不過伸長之後條尾就會變成向後斜(本身係直向上)。耳仔嘅活動性就非常高啦。

抱抱龍嘅可動位算係多。首先個口可以打開，雙手肩關節同雙腳髖關節亦可以上下活動，另外對腳嘅膝關節可以稍稍向後。特別值得一讚嘅係就算只係得兩隻腳，佢自己都企得好穩陣。

最後係火腿，佢嘅可動性係……基本上係零

好啦，開始合體啦！由於啲變形、合體步驟幾實幾複雜，我強烈建議你一定要拆本說明書出黎對住整(我本身以為我玩咗咁多年玩具，應該唔使拆啦，點知係完全唔知佢咩構造)。

首先係相對簡單嘅胡迪，合體之後佢將會成為整隻超合金嘅核心。先將雙手向後摺(所以就要有雙關節)，再將佢對靴嘅上半部份移上大脾、腳板部份向下摺。不過圖中我漏咗個步驟，就係將兩邊靴位擰返去前面。

之後係左手彈弓狗，先拉長「狗身」，再將四隻腳180度擰向上(留意條尾嘅位置)，最後喺個背(原本嘅肚位)拎個接駁位出黎——留意！佢個接駁位係極．難．拎出黎，最後我根據另附嘅說明書用工具撬佢出黎，但咁樣其實好易整花……

之後係左腳火腿，呢隻就好簡單啦！先打開個豬身，拎收埋咗嘅黑色金屬部出黎，打開就會成為合體嘅腳板。再將個豬頭摺返入個身度，再打開原本位於豬身左右嘅部件就得啦！

右腳抱抱龍就開始複雜啦。首先將條尾向上拗，會帶出原本收喺肚底嘅黑色部件；之後將頭部向下摺，再將成條頸摺入肚嘅位置。留意打開條頸後會見到個窿。

之後就拆開啱先拎出黎嘅黑色部份，再一次係合體後嘅腳板。呢個時候最令人迷茫嘅就係究竟邊邊係向上，所以啱啱個窿就有用啦，佢係用黎接駁上身嘅，以呢個為標準就搵到上下左右。最後將兩隻腳轉向下，然後擰轉腳板就得啦。

但真正複雜係紅心，因為佢會同時成為合體後嘅上身以及右手。首先將四隻腳向上摺，之後再將(本身位於肚)嘅星星胸章、連埋紅心嘅兩四支火箭轉去側面，呢邊會係合體後嘅心口。再打開整個星星胸章，拎出收喺入面嘅右手。

好啦，問題又黎啦！根據說明書，下一步係將紅心個頭向內摺，同時將右手關節收入膊頭(即係紅心條頸)入面。問題係我收到個關節，紅心個頭就收唔哂入去；收紅心個頭呢，個關節又收唔到入去……最後我就放棄咗紅心個頭。

之後再將右手砌起，拉開馬鞍，所以變形就完成。可以開始合體啦！

首先係將胡迪嘅上半身攝入紅心嘅馬鞍位置，要留意嘅胡迪個上背同下背各有一個榫位，再對返紅心個鞍嘅固定裝置，問題個固定位太細而紅心就太重，結果胡迪個頭就好易穿出黎。

之後裝上彈弓狗，成為右手。不過因為個接駁位嘅角度問題，所以其實又有啲難裝。

最後就將胡迪嘅兩隻腳攝入火腿同抱抱龍入面。不過因為個接駁位非常難就，而砌起咗嘅上半身又唔輕，所以係頗狼狽嘅。

最後就裝上胡迪頂帽，拉出面孔，呢隻《Toy Story》超合金就完成啦！

結論：

作為超合金嘅出品，呢隻《Toy Story》不負所望，造功仔細之餘用料亦十足。而就憑我淨係變形合體都搞咗將近九個字，可玩性都相當高，而且仲有隨機附送嘅漫畫繪本。以呢個價錢(17500Yen，折合港紙約1200銀)黎講都算係相當唔錯。不過合體時某啲接駁位真係幾難裝，合體完成之後因為所有重量都靠胡迪支撐，所以有挺唔直條腰(胡迪嘅髖關節受力向前拗)嘅情況，合體之後基本上亦無可動性。不過買得呢隻，大家都一定會買埋之後嘅巴斯光年超合金，最終目標係合體成為「GANGREAT JING」。作為「半隻」超合金黎講佢交足貨啦！