{ SKIP }
文:李羅渣  
POSTED ON 21 Dec 2016


上星期英超前列對決,阿仙奴1﹣2作客反輸俾曼城,本來對住近排勢頹嘅曼城,就應該係阿仙奴追近榜首車路士嘅好機會,可惜一個唔該反輸,突然又返咗去熟悉嘅第四位。而除咗比賽,另一個困擾球隊嘅問題就係要同隊中主力續約。因為「山神」阿歷斯山齊士嘅合約仲有年半左右就到期,但係續約嘅談判過程就唔係好順利。山神希望新合約會得到25萬鎊週薪,而阿仙奴就猶豫不決。就能力而言,目前嘅阿仙奴比起當年酋長球場剛落成時都鬆動唔少,一切都睇阿仙奴肯唔肯為咗爭冠而畀多啲錢留住主力。



山齊士自己就開到口話希望留隊,喺阿仙奴嘅日子仲過得好開心添!當然啦,以前喺巴塞坐多過踢,嚟到阿仙奴成為進攻主力當然高興。但阿記最大問題係雖然呢幾年實力增長唔少,但到底有幾大決心去驘錦標就好令人懷疑。除咗近三年兩奪足總盃之外,歐聯持續都係十六強出局。而且近呢兩個轉會窗,除咗施治同梅斯達菲之外都無乜觸目嘅收購。好多時甚至喺比賽之中,大家都會見到班球員好似對勝負無乜所謂,只有山齊士自己失落同無奈。自己同球會方向唔一致,都係山神續約有阻力原因之一。



另外雲加年底就會同阿仙奴完約,不過而家就到半季,仍然無雲加嘅最新去向。一方面阿仙奴又唔係太積極去同雲加傾續約,與此同時外間又有唔少阿仙奴搵緊下任領隊嘅傳聞。雖然有報導指無論雲加去留,都唔會影響山神甚至奧斯爾續約與否。但話晒一朝天子一朝臣,阿仙奴應該盡快對雲加嘅問題有個答案,唔係好多球會就會喺呢個時候乘虛而入。



加利佬喺天空體育就話,阿仙奴出過比佢山神同奧斯爾更出色嘅球員,所以阿仙奴唔會無咗佢哋就唔得。唔可以話佢錯晒,但你試諗下有幾多頂級球員會願意嚟阿仙奴?不過可以肯定,錢唔會係山神留喺阿仙奴嘅主 要原因——因為講錢,你永遠唔夠中超鬥。最重要係阿仙奴由高層、領隊、球員甚至球迷認為阿仙奴應該係一隊點嘅球隊,又要爭取一個點樣嘅成績。可以肯定嘅係,以阿仙奴近年嘅實力,以英超冠軍為目標絕對合理,一切只係取決於阿仙奴有無呢種志氣。而呢點,或者就決定到山齊士同奧斯爾下季仲會唔會著阿仙奴波衫。


李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達,最想成為有些少生活品味嘅偽文青。




由George R.R. Martin創作嘅《A Song of Ice and Fire》(冰與火之歌)係過去30年中最著名嘅奇幻小說系列之一,其改編而成嘅HBO劇集《Game of Thrones》亦曾一度佔據「神劇」位置。不過其實原著小說自2011年推出第五 ...
hobby
【影視】《Witcher》原作者表示同情G.R.R Martin 指《Game of Thones》劇集係新書拖延原因
02 Jul 2025
繼2015年《The Martian(火星任務)》大獲成功後,原作者Andy Weir所撰寫嘅另一部暢銷小說《Project Hail Mary(末日聖母號)》亦被搬上大銀幕。荷里活型男Ryan Gosling將飾演一名初中老師,為拯救人類獨自踏上太空 ...
hobby
【影視】科幻電影《Project Hail Mary》公開首部預告!Ryan Gosling為拯救全人類獨自上太空
01 Jul 2025