聖誕要過Lonely Christmas 已經慘情，捱到boxing day想睇下英超一雪寂寞之恥，如果咁都要無信號就真係人都唔想做。講緊嘅係上星期先裁員兼盛傳財困嘅樂視，前晚boxing day竟然有幾場波忽然斷線。原來今年以天價奪得英超轉播權嘅樂視到而家仍然拖欠英超直播費，所以有消息話英超方面喺星期一取消樂視直播信號，好彩去到27日凌晨一點半候城對曼城場波又睇得返。

樂視雖然係2004年已經成立，不過係呢幾年先叫做有啲名氣，因為做數碼電視盒呀嘛，甚至有人叫佢哋做「中國netflix」。而呢兩年佢哋擴充真係快到難以置信，仲好似阿信屋咁乜鬼都做。除咗視頻之外、連電動車、房地產、互聯網金融都撈埋。投入就快，不過回報永遠追唔上，最後換嚟就係財困，連CEO賈躍亭都向內部出千字文承認公司擴張太急，連帶美國電視商Vizio嘅收購計劃都要擱置。不過大陸企業大部份都係汁都撈埋樣樣都做，外間有分析指出樂視仍然處於夢想期，將來係龍係蛇難以估計。

其實樂視開始英超轉播權後，服務都有唔少爭議。好似大陸樂視嘅服務計劃比香港多元化得多，例如你可以指定睇某間球會嘅比賽，又或者只睇強隊比賽都可以，香港就只有唔同合約期嘅計劃俾人揀，而且價錢俾以前now貴唔少。俾貴啲都算啦，但又有唔少人投訴樂視成日都收唔到，睇睇下又斷線，加埋呢次事件，相信打算申請樂視嘅朋友都會重新考慮。

講開又講，喺香港地做球迷真係幾慘。由有線帶頭開始，睇波就一定要睇收費電視，而體育賽事嘅轉播權費用本身就有加無減，然後呢啲費用又轉嫁返畀球迷，到而家仲倒退到貴一貴簽約但連波都睇唔到。反觀大陸嘅地方電視台都可以免費睇到波，香港呢啲位真係衰過大陸。英超賽會經過呢次樂視事件後，都應該喺出售轉播權時了解一下該電視台嘅營運狀況。英超近年咁重視亞洲市場，呢件事對佢哋嘅發展其實都有影響。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青