荷蘭名宿雲巴士頓而家做緊FIFA 嘅技術總監，上任以嚟佢花唔少時間去研究改革足球賽例。近日佢發表驚人「研究成果」，提出一連串改革，例如球賽時間由上下半場改為四節、增加換人名額、罰離場十分鐘嘅橙牌、互射十二碼改為球員27碼挑戰門將等等，如果要慢慢講解，分分鐘講到雞年都講唔晒。其中一樣好多人都會好介意嘅就係取消越位，雲巴士頓表示現今足球太重視防守，取消越位有助增加入球咁話。不過講真，足球如果無咗越位，唯一好處就係有女朋友嘅球迷唔需要再為向女朋友解釋咩係越位，除此之外都冇咩著數啦！

首先，無越位其實先更容易泊大巴。前鋒要入波好簡單，只要越近禁區就越好，咁無越位而又要防守佢，成班後防就唯有塞晒喺禁區，咁中場就唯有咁斬個波埋去搏一搏，有就有無就無。最後成場波就只會見到個波喺個天飛嚟飛去，我就真係唔知有咩好睇。而且有越位嘅限制之後，除咗更加考驗球員嘅視野同創造力，領隊亦可以制定相應嘅戰術，特別係防守方，越位陷阱係恆之有效嘅防守方式。多入球當然有助吸引更多人欣賞足球，不過足球引入勝嘅地方又點止入球咁少呢？

雲巴士頓嘅改革建議當中只有一樣相信係無乜爭議，就係限制球員一季只上陣60場。可行性先唔討論，但現代足球嘅比賽場數確實係越嚟越多，對球員體能負荷好大，除咗影響狀態，分分釮影響埋佢嘅足球生涯，如果FIFA真係能夠限制場數都算係德政黎。其實足球規則會隨時代改變完全唔出奇，不過相比起規則，引入更多現代化技術協助球證，同埋防止足球過度商業化反而更加重要，喺呢方面，就唔係好見FIFA做過乜啦。