英超賽會周中宣佈球證卡頓保將會離開英超，「轉會」沙地阿拉伯足協工作，相信都係英超球迷喺情人節之外嘅開心事－－梗係啦，試問有邊隊無俾卡頓堡嘅「神哨」關照過？佢最後一場為侯城對阿仙奴執法更加睇漏「山神」用手拍入皮球，真係送佢去火星執法都唔旨在！不過走咗一個卡頓保，英超仲有千千萬萬次低水平執法，就算其他聯賽，球證嘅水準比起十幾年前亦好似多咗爭議。喺呢個時候，我就好懷念光頭佬球證哥連拿。

呢位來自意大利嘅球證本身並唔係做足球相關嘅工作，而係喺銀行做金融顧問，球證係業餘興趣咁解。奇又奇在原來哥連拿唔係最鍾意足球，反而係鍾意籃球。由17歲已經開始做球證嘅佢於九十年代喺意甲開始成名，唔止球迷，連好多領隊都對佢讚不絕口。例如當時外界經常批評哥連拿針對祖雲達斯，不過喺哥連拿掛哨時時任祖雲達斯領隊嘅卡比路都對佢讚譽有加，而且哥連拿試過贏到7次意甲最佳球證，執法水平無容致疑呀！

國際執法方面，哥連拿由1995年開始就成為FIFA嘅球證名單其中一員，基本上你講得出嘅大賽佢都吹過，好多仲要係決賽。不過要講令佢人氣急升嘅，就一定係2002年世界盃決賽德國對巴西，當時兩隊都有唔少性格巨星，加上睇開波都知球員都好鍾意圍球證，但哥連拿從來都唔會被呢啲壓力拋窒，結果成功控制場面贏得各方讚賞。有趣嘅係有時任德國門將簡尼曾經講過哥連拿吹親嘅比賽佢嗰隊都無運行（1999年歐聯決賽拜仁慕尼黑1-2曼聯；2001年友賽德國1-5英格蘭），點知呢次都一樣，巴西以2-0氣走德國捧走世界盃。

2005年哥連拿同汽車製造商OPEL簽咗一份80萬歐元嘅贊助合約，而OPEL就係當時AC米蘭嘅贊助商，意大利足總為免有利益衝突就將哥連拿調去意乙執法。但其實哥連拿之前都有幫過Adidas賣廣告，但FIFA同樣放心搵佢喺2002年世界杯決賽，呢場當時被評為Nike同Adidas之爭嘅重要賽事搵佢執法。哥連拿有感不被信任，之後諳然掛哨。之後佢就成為歐洲足協球證委員會成員，間唔中就拍下廣告咁。

相比之下，現今嘅球證唔好講執法尺度，有時連基本嘢都未做好，甚至認錯人呢啲低級錯誤都夠膽死犯得出。好似2013-2014年球季中車路士大勝阿仙奴6-0嘅比賽，明明係阿仙奴嘅張伯倫犯手球但球證馬連拿就趕咗基比斯出場。如果球證水平再唔提升返，就算畀幾多錢搞高科技輔助都唔會補得返。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。