上星期拜仁中場沙比阿朗素宣布季尾退役，又一個巨星引退固然令人諳然神傷，而如果要數類似打法嘅經典巨星又未掛靴嘅，可能要數到意大利中場大師派路。派路好波唔在講，佢更加係Deep Lying Playmaker呢個位置嘅元祖級代表人物，即使已經年屆37歲高齡，仍然憑足球智慧同經驗屹立於球場之上。雖然呢位球壇富二代未有宣布任何退休大計，但以佢年紀，真係睇一場就少一場。

派路家族擁有四大朱古力廠之一Ferrero同鋼鐵廠Elg Steel嘅股份，所以基本上只要派路安安份份幫下屋企打理生意，相信下半世都唔使點憂。不過派路自細係好鍾意足球，為咗成為足球員仲試過同屋企起衝突，好在13歲嘅時候就得到爸爸嘅朋友力撐追夢，幫手勸服派路爸爸，我哋先有機會喺球場上見到呢位球場建築師。派路職業生涯贏過兩個歐聯冠軍、六個意甲冠軍仲有一座世界盃冠軍，除咗要多謝呢位uncle，最需要多謝嘅相信就係佢另一位恩人安察洛堤啦。

有睇開意甲嘅球迷或者會知，派路出道嘅時候其實係打進攻中場，不過AC米蘭當時中前場有人滿之患，根本就唔夠位畀派路打，當時仲一度仲有評論話派路並唔適合留喺米蘭。但安察洛堤慧眼獨到，將派路移後一格打中場中，喺中後場負責派牌同攻守轉換等工作。派路雖然體能、身形同速度都唔算出色，不過由於打進攻中場出身，技術就非常出色，特別係護波同埋傳送更加係首屈一指，處理死球亦有一手，加上防守方面一樣做足功課，所以叫佢做球場建築師絕對無講錯。

我哋之所以要好好珍惜派路，除咗因為佢本身好波同戰績彪炳，更加因為佢喺安察洛堤手下創造咗一個新位置 Deep Lying Playmaker，直到而家，Deep Lying Playmaker都係足球戰術上一個非常重要嘅位置。呢個位置要求球員傳送技術、閱讀球賽能力同埋經驗都缺一不可，而派路就三樣有哂，所以先有本事越老越可愛。後生一輩嘅法比加斯、卡域克、摩迪雖然打法相近，但功能同效果都無派路咁全面，就更顯得佢難能可貴。香港睇美職聯就難少少，不過派路仍然未正式宣布退出國家隊，如果下年都無掛靴而佢又入到國家隊，我哋或者仲有機會喺電視上見到派路嘅風彩啦！

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。