呢排國際局勢緊張，大家都好擔心會唔會打仗。而4月12日歐聯八強多蒙特對摩納哥嘅賽事，多蒙特嘅隊巴就受到炸彈襲擊。不幸中嘅大幸係蜜蜂軍團大部份成員都無事，只有西班牙中堅巴查右手骨折，需要休息四個星期。襲擊之後歐洲足協特別將比賽延期一日，於4月13日舉行。問題係由法國遠道而來嘅摩納哥球迷就要逼住留多晚，咁點算？好彩多蒙特球迷非常有人情味，積極響應雙方球會發起嘅「beds for aways fans」行動，等班法國球迷可以第二日再入埸睇波。

雖然賽前受恐襲影響賽事，不過兩軍球迷非常團結同勇敢，亦無因為球賽要取消而鼓燥。本來已經入場嘅多蒙特球迷知道球隊隊巴受襲仲不斷唱隊歌支持球隊，然後有秩序咁離開球場。多蒙特球迷就話近水流台，今晚無波聽最多聽晚嚟過，但摩納哥球迷就無理由今日返去聽日再返嚟掛？呢個時間就顯現到足球係一種世界語言，好多多蒙特球迷即刻響應「beds for aways fans」行動，唔止淨係收留摩納哥fans瞓一晚，仲包食包飲。不過可能球隊可能驚魂未定，多蒙特首回合最後以2-3輸咗俾摩納哥，要出線下場要贏之餘仲起碼入到兩球。

雖然比賽順利進行，但其實歐洲足協要多蒙特喺受襲後翌日即刻作賽，外間有好多非議。用比賽公平性嚟講，多蒙特球員受襲肯定嚇一嚇，心理上係唔係最佳狀態已經成疑問。另外當然就係保安問題啦，大吉利是講句，兇徒如果有後著，喺第二日比賽再出手，後果就難以想像。需知道如果對方於球場呢啲人山人海嘅地方施襲，直接傷亡人數一定唔會少，最大件事係球迷因爲走避而做成嘅混亂，萬一發生人踩人之類嘅災難就真係不堪設想。賽後多蒙特領隊杜慈就表示，歐洲足協當日只係以電郵通知球隊翌日要即時比賽，令佢感到非常不被尊重，認為歐洲足協嘅決定好荒謬。

襲擊發生後，多蒙特曾經考慮退出今屆歐聯賽事。不過前美國總統羅斯福都講過，我哋需要恐懼嘅就係恐懼本身，如果真係唔踢，就等同向恐怖份子屈服。而今次多蒙特同摩納哥嘅球迷就表現出愛同團結可以戰勝一切，更係表現出足球最美麗嘅一面。尋日同時係希斯堡球場慘劇28周年，祝願96位遇難利物浦球迷安息。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。