如果大家有留意，早前已經喺台灣舉行過兩次嘅《Run For Your Lives》賽跑活動喺黎緊10月2日重陽節當日就會正式登陸香港！由於反應熱烈，13,000張門票老早就已經賣哂，所以與其再介紹個活動，不如就等我同各位買左飛嘅讀者分析一下究竟點樣攻破呢個號稱生存率只有20%嘅喪屍陣！

賽道介紹

首先你要清楚遊戲玩法。《Run For Your Lives》的玩法是要跑者在一條精心設計的賽道中，一邊越過重重障礙同多個喪屍陣，並且最少保住腰間三條「生命旗幟」的其中一條，就為之「生存」，若果三條「生命旗幟」都被喪屍們扯走，就為之「感染」，所以是一個要求大家體力與智力兼備的賽事。香港站的賽道是由西九海濱長廊改建而成，全長大約5km，中間設置左7個障礙關卡與12個喪屍陣。障礙關卡包括聽到都覺得攰嘅33呎「隧道繩網陣」及「喪屍大迷官」。之於12個「喪屍陣」就當然係滿佈喪屍準備扯走你的「生命旗幟」。主辦單位話要玩哂成個賽道大約需要一個鐘。

聽到個賽道設置，又再諗下香港啲天氣，你都知體力就係致勝關鍵。由於賽事不設限時，而且「理論上」喪屍只會喺「喪屍陣」出現，所以大家不妨喺各障礙關卡儘量保持體力，去到「喪屍陣」之中先出力跑，反正又唔係鬥快嘅！大家亦應該多多利用喺賽道中的水站補充水份。

「感染者」獎章和「生存者」獎章

要增加自己以「生存者」身份完成賽事的機會，你需要一班好隊友－－準確啲講，係一班會為左你而犧牲自我嘅好隊友。因為無論參賽者保唔保得住啲「生命旗幟」，其實都可以完成賽事，分別只係最後拎到的獎章不同。換句話講，冇哂三條「生命旗幟」，已經係「感染者」嘅人就係你最好嘅保鑣！只要有返三五七個「感染者」，你就可以成個亡靈法師咁控制佢地保護你，到時要毫髮未損咁完成賽事都絕對有可能！

呀唔知點解我覺得女參賽者、尤其係靚嘅女參賽者的「生存」率突然高左好多添！

「生命旗幟」

呢個係美琪BB黎

假如你都真係失手被擒做唔到「生存者」，其實都仲有辦法成為贏家。除了主賽事之外，當日還會有不同的遊戲，亦有個人及團隊的「最佳服飾大獎」，冇信心跑得快過啲喪屍嘅，可以選擇靚過佢！主辦單位亦強調佢地想把《Run For Your Lives》打造成一個「週末社交活動」(雖然嗰日係禮拜4而且第二日要返工……)，而不是單單一個障礙賽。所以場地設有嘉年華區，介時會邀請不同的本地音樂人上台表演，亦有美食與啤酒提供。當日下午5時起就更會舉行「末日派對」等大家狂歡同識下朋友，一個唔該識到個靚女你就係「人生贏家」啦係咪！？

順帶一提，大會在嘉年華區有設置更衣室和沖洗區，但由於人數眾多，我勸大家就唔好寄予厚望。

C All Star

買唔到飛點算好呀！主辦單位話下年都會再黎香港舉行《Run For Your Lives》，而且地點可能會移師山上，甚至是地鐵站中。今年玩唔到就唯有下年請早啦！

關於Run For Your Lives Hong Kong

活動日期:2014年10月2日 (星期四)

活動時間:上午9 時 –下午9時

活動地點:西九文化區西九海濱長廊

官方網站:www.runforyourlives.asia/hk