之前報導過嘅美國鬼屋 fright dome 上個星期就已經喺山頂廣場開幕。究竟呢個號稱全球最恐佈嘅鬼屋有幾得人驚？又值唔值得你山長水遠撲上山頂？

今次Fright Dome首次衝出美國，黎到山頂廣場三樓設立全球第二個Fright Dome。會場主要有兩個以不同電影為主題的會區：「殺人小丑」及「德州電鋸殺人狂」，再加上4D鬼屋及喪屍遊行等要素。至於另一邊的觀景台則設有「真鬼出籠」驚駭區、恐佈場景、多媒體燈光騷、驚嚇遊戲、恐佈照相區等。務求山頂美景下打造一個多元的驚嚇體驗！

香港鬼？美國鬼？

負責人在早前的發佈會一再強調會溶入更多亞洲文化，但就現場所見仍是以西洋驚嚇元素居多。小丑、疆屍、女巫、血掌印等等隨處可見。不過，入得場就預左比你嚇，隻鬼講中文、講英文定講泰文其實都冇分別架喇！與其追究隻鬼裝西裝定唐裝，不如問，佢究竟得唔得人驚？

驚？唔驚？

由於媒體體驗設在日頭，即使用觀景台展區就已經有演員扮鬼搞氣氛，不過日光日白，就算佢哋真係拎住個電鋸衝埋黎斬你，你都真係好難會驚。相信要到入夜先可以真正體驗觀景台區的氣氛。

但入到鬼屋就唔同講法，礙於場地本身所限，每一個主題鬼屋實際佔地不大，於是大會用上宜x傢私的店鋪設計，將每個區域劃成一條窄到肥些少都會kick 住的通道，再加上用黎製造氣氛同盲點嘅布濂、膠布、「死屍」同「腐肉」。除了壓逼感十足，亦暗示你會同班鬼有異常近距離嘅接觸！在若有若無的燈光，和一片白茫茫嘅迷霧之中，啲鬼幾乎係喺你耳邊跳出黎乜滯！衝擊力十足！

值得留意嘅係場區唔係完全密封，在區與區之間會有一小段露天空間。假如在日頭去，由鬼屋出黎見到一片光明，簡直有心廣神怡之妙用。所以你信我，就算貴$100，但如果想感受到更驚嚇的感受，真係要買夜飛！

化妝、佈置成賣點

Fright Dome一直都以由 Gary J. Tunnicliffe打理的道具、化妝和場境作主要賣點。事實上在體驗日雖然只開放部份場區，但仍然可以感受到Gary的功力。印象最深的是以「德州電鋸殺人狂」為主題的鬼屋裏，團隊成功打造出一個無論視覺、觸覺甚至嗅覺都非常像真嘅屠房。連由天花吊落黎的「假豬」都份量十足，再加上提著電鋸在暗角守候的殺人魔，的確成功地把電影的恐怖氣氛以場境帶出。

人數、交通是最大敵人

之但係咁，凡事有得必有失。正上面話齋，今次活動場地設在山頂廣埸三樓，有去過你都會知嗰到真係稱唔上係「大」。而根據大會估計的人數，每晚可能會有數千人入場，換言之如果你冇買最貴的特快入場証，你就要有心理準備可能要排好耐。而萬一大會稍為有些少心急放多咗人入場，又或者前面一組的參加者行得慢，就有可能變成十幾個人一齊喺窄巷中行走，咁其實同去歡樂天地冇分別。而如果你去歡樂天地都驚，咁其實你唔使去鬼屋呀？

另外交通都是一個大問題，上山頂有幾多個方法大家都知，最快捷方便嘅中環纜車載客量有幾高、一到夜晚又或者週末，有幾多遊客會搭，大家亦心中有數。到時上唔上到山，可能都係一個問題。

總結

既然Fright Dome挾「全球最驚嚇鬼屋」之名來港，無論你是真心想被鬼嚇定只係想應一應節，它都有足夠理由吸引你上山頂體驗一次。但我建議你要在買票時細心選擇日子，可以的話盡量選擇避開人流，才可以好好感受一下這個由美國恐怖之最揉合香港山頂美景的全新驚嚇體驗！

FRIGHT DOME 香港

*門票於Groupon獨家發售: promotions.groupon.hk