潮的Ikea 聯乘Chris Stamp「SPÄNST」系列

文：MenClub 魏文青　　
POSTED ON 31 Jan 2018

Ikea傢俬嘅賣點不嬲都係相宜嘅價錢、簡潔嘅設計同大量收納空間，係就係能夠佈置出一個舒適嘅屋企，但如果你追求一個有些少「潮」嘅家居，恐怕佢就未能滿足你。或者Ikea都想求變，所以上年就宣佈同洛杉磯街頭品牌設計師Chris Stamp推出聯乘系列「SPÄNST」(瑞典文中嘅「閃電」)，更於早前嘅巴黎時裝週上展示部份作品。

Stamp嘅設計同Ikea一樣都係以簡潔為主，但就更有年輕活力嘅味道，所以「SPÄNST」系列除咗會有常見嘅檯檯櫈櫈，更加有掛牆籃球圈、滑板、滑板架等全新嘅傢具。另外亦知道一眾Streetwear愛好者鍾意展示自己嘅珍藏(而非Ikea一貫「唔用就收埋」邏輯)，所以Stamp亦設計咗一系列開放式儲物空間。黑白配色、裝飾用霓虹光管、使用木材皮革為主要物料等，都為Ikea增添少有嘅潮流味道。

「SPÄNST」系列會於今年5月前於外國率先推出，香港Ikea就唔知幾時會跟隨。到時一眾年輕人喺佈置自己屋企嘅時候又多個選擇啦——如果你有「自己嘅屋企」。