問問大家，呢個世界上每年流通量最大嘅書藉係咩書？我相信好多人會答聖經，但根據BBC 2018年推出嘅節目《Flatpack Empire》，答案應該係每年都可以派到超過2億本出去嘅Ikea實體目錄——又或者我應該話「曾經係」，因為Ikea宣佈，將會中止製作呢本有70年歷史嘅目錄。

圖片：Ikea.com

Ikea目錄係由創辦人Ingvar Kamprad於1951首先製作，隨後就成為Ikea每年嘅傳統，每年推出之後都會帶動Ikea嘅銷售數字。不過據Ikea於官網所講，近年因為網購嘅興起，顧客更常使用網站查閱Ikea嘅最新產品，會真正拎本目錄返去慢慢睇嘅人亦越黎越少。喺荷蘭測試過大幅減少派發目錄之後，Ikea就決定十月啱啱推出嘅2021年版會係最後一本。

今年10月推出嘅最後一本Ikea目錄

圖片：Ikea.com

據《CNN》報導，過去一年疫情令到訪Ikea店嘅人客大幅減少，但啲人唔係唔買傢私，而係轉哂做上網買。Ikea.com去年銷售數字急升45%，12個月內有多達40億次瀏覽。集團CEO Jon Abrahamsson指，未來Ikea將會維持「郊區大型倉庫 + 市內小型店鋪 + 線上商店」嘅「全市場經營模式」。