香港人返工為咗放假、放假為咗去旅行，而過去一年好多人冇工返、全世界都冇得去旅行，可想而知對香港人黎係幾咁難過。咁如果為咗可以去旅行，大家又願唔願意放棄自己份工、全部積蓄、一年嘅性愛、甚至你嘅伴侶？你又唔好話我痴線呀，因為有唔少美國人都願意架！

網站Trivago早前於美國及英國訪問咗超過2,000名成年人，問下佢哋為咗可以去返旅行會願意放棄啲咩，結果有近一半表示願意放棄目前嘅工作，38%人表示願意一年唔做愛、四份一人願意放棄全部積蓄、更有20%人表示願意放棄伴侶。

值得一提嘅係，同一班人中有80%表示旅行係圓滿生活嘅重要部份，換言之呢個調查的確係集中咗一班好想去旅行嘅人。

圖片：The Secret Life of Walter Mitty

唔知如果有得揀，大家又會放棄邊樣？我就一樣都唔會放棄——主要係因為冇咗份工就要移民地府、而做愛、積蓄同伴侶呢三樣嘢我都冇嘅，所以冇得放棄。