「瞓覺」係人類每日必需，但對好多人黎講，「瞓個好覺」就唔係一件必然嘅事。都市人嘅睡眠質素問題，甚至衍生出一個龐大市場，坊間亦有眼罩、補充劑、CBD等各式各樣嘅助眠產品。不過日本小林製藥就推出咗一樣頗為「奇怪」嘅助眠產品，就係「發熱耳塞」。

日本小林製藥以往都推出過唔少助眠產品，例如發熱眼罩、防止打鼻鼾嘅呼吸貼之類，而最新推出嘅「發熱耳塞」，顧名思義就係一個識發熱嘅耳塞，亦係史上第一個同類產品。日本小林製藥並無真正交代點解一個發熱耳塞能夠幫助入眠，但反正呢個能暖住對耳仔，又能夠隔絕嘈音嘅新產品，喺初期測試時就大受歡迎，今日宣佈會於今個星期 (喺日本) 推出時亦喺Twitter獲得好多人支持。

小林製藥指耳塞嘅溫度只係「暖暖地」，而且只係發熱20分鐘，所以唔怕會瞓瞓下熱醒，就算夏天都一樣適用。不過佢亦提醒用家要考慮到聽唔到鬧鐘嘅問題。