作為真實版「攞你命3000」，瑞士軍刀巧妙地收埋小刀、剪刀、螺絲批等多種工具，集工藝於實用之美於一身，亦係唔少「Every Day Carry（EDC）」愛好者嘅必收之物。不過近日瑞士軍刀生產商Victorinox就宣佈，由於全球暴力事件越趨常見，令各國收緊刀具規管，所以未來會推出「無刀」嘅新版瑞士軍刀。

目前Victorinox推出嘅瑞士軍刀中，基本嘅款式會有牙籤、小鉗、指甲銼及小刀四種工具，但品牌CEO Carl Elsener日前接受瑞士媒體《Blick》訪問時，就表示因為近年世界各國不停出現暴力事件，擔心各國會收緊武器規管，所以未來將會推出「無刀版」瑞士軍刀。佢表示：「我哋研發緊一款冇刀嘅瑞士軍刀，例如我就覺得可以放一款好有型嘅單車用工具入去……踩單車嘅人可能需要特別嘅工具，但唔一定需要一把刀。把刀亦令我哋嘅產品於某啲市場中，有種武器嘅形象。」但Carl Elsener強調，「無刀版瑞士軍刀」並非取代原版，佢哋只係會推出一個「無刀」嘅新款式供買家選擇

Carl Elsener亦表示，其實2001年嘅「911事件」後，佢哋嘅瑞士軍刀銷量曾經大跌30%，當時佢哋就知道唔可以再靠單一產品生存，所以積極開拓其他業務。例如2011年時就統一以「Victorinox」名義推出餐具、2012年時將品牌授權予TRG Accessories（2014年收購埋人哋）開始生產旅行及商務用品等。

資料來源：New York Post