唔少人鍾意去日本嘅其中一個原因，就係當地有著明顯嘅四季變化，春天睇櫻花、夏天睇煙花、秋天睇紅葉、冬天睇雪，次次去都有啲新嘢可以睇。不過據日本氣象廳近日公佈，東京及京都等地區今年嘅「夏日」佔比創歷史新高，甚至有望去到11月都仲係夏季天氣，換言之日本今年好可能冇「秋天」。

日本氣象廳將最高氣溫高過25度嘅日子列為「夏日」，而今日（24日）朝早10點左右嘅東京都心氣溫繼續突破25度，換言之今年東京都心嘅「夏日日數」已經達153日，創下東京歷史紀錄。另一邊廂，較為南部嘅京都市截自昨日已經有161個「夏日」，全年夏日佔比高達44%，同樣創下京都紀錄。據媒體報導京都於1991年至2020年每年平均夏日日數僅為142.6日，亦即今年嘅夏日已經長咗近20日。

圖片：Tenki.jp

而且據日本氣象廳前幾日公佈嘅未來三月天氣預測，因為有拉尼娜現象抵抗北方冷空氣，所以日本會一直熱到11月，然後於12月跌回平均嘅冬天氣溫，並維持到1月。換言之今年日本好可能會無秋天，11月仲係夏天然後快速降溫進入冬天。其中北陸地區及東北地方西部（青森、秋田、山形一帶）嘅降雪量更會比平均高。所以大家打算於未來幾個月去日本的話，就要更加小心留意天氣啦。

資料來源：Tenki.jp