截至3月31日為止，Disney最新真人版電影《白雪公主》全球票房為1.4億美金，距離傳聞中高達2.5億美金嘅拍攝成本仍然有遙遙長路，如無意外就應該會蝕到入骨。電影蝕到扒喺到，固然有Disney近年所有真人版改編嘅問題，但更重要嘅係女主角Rachel Zegler嘅激進發言、七個小矮人變七個CGI「麼法生物」結果引來侏儒症演員批評等風波進一步影響電影嘅觀感。而根據英國報章《Daily Mail》報導，《白》嘅失利為荷里活近年流行嘅「覺醒文化」敲起喪鐘，各大片商正「驚恐地」急速轉軚，希望脫離DEI浪潮。

《Daily Mail》指自己與「迪士尼內部人士」、「金像獎提名監製」、「Amazon Prime Video內部人士」、「中年男性編劇」及「中年白人女性製作人」等多位荷里活人士討論過相關話題。其中「迪士尼內部人士」指出，「當#Metoo運動及George Floyd事件發生後，所有片商都跳上咗『覺醒』馬車。但五年後嘅今日，大家都出盡全力拯救自己及整個荷里活。你唔可以低估與大門後嘅驚恐情緒，感覺就好似係為生存而戰一樣。」

而「金像獎提名監製」就點出，近年奧斯卡金像獎為提名電影加入DEI相關要求——電影要有幾多小數族裔、幾多女性、幾多殘障人士——結果就係頒獎禮上充滿「大家都唔在意嘅電影」。「《教父》或者《北非諜影》依家唔會有提名，因為佢哋嘅演員陣容唔夠多元。反之，依家有《Emilia Perez》呢啲除咗極左自由派人士之外冇人鐘意嘅電影。」

同時呢位監製亦指出，片商早年大賣「覺醒」亦唔係真正支持運動，只係認為「可以吸引到一班新嘅、年輕嘅觀眾，賺佢哋啲錢。結果就係激嬲哂所有人。」另一位「Amazon Prime Video內部人士」亦有類似嘅觀點：「大家從來都唔係真正為咗幫弱勢社群，對絕大部份高層黎講DEI只係為咗賺錢，依家出事啦大家就趕住轉軚。」

而「中年男性編劇」及「中年白人女性製作人」亦不約而同地指出，片商近年愛用DEI班底黎製作電影，但其實佢哋根本缺乏經驗，最後片商只能搵佢哋黎救火。但問題係片方立即過橋抽牌，唔畀二人嘅名字出現於製作名單之上。「中年白人女性製作人」甚至指出佢幫手嘅電影最後有獎攞，但佢就因為「白人女性企喺一堆非裔美國人之中畫面唔靚」而被拒絕上台。

而目前各大片商其實已有相應行動。《Daily Mail》指出Disney動畫《Win or Lose》去年取消當中一位跨性別角色，Disney於公告中寫道「理解很多父母希望按照自己嘅安排及時間去討論某些議題」；Amazon亦將現任美國總統Donald Trump主持嘅真人騷《The Apprentice》拎返出黎播，收視仲相當唔錯。

不過「迪士尼內部人士」亦指出，荷里活素來係「風吹邊邊就倒向邊邊。依家大家紛紛放行『非覺醒』計劃，希望去討好傳統嘅Disney粉絲。」換言之，未來風向又有變之時，荷里活亦好可能會跟住變。

資料來源：Daily Mail