今次安室嚟香港行程都幾急，急到連記者會都係得嗰10分鐘，安室出嚟同大家say個hi之後就要走，fans想望多眼都唔得。好在之後都有個訪問環節，但係時間有限兼已經預設好問題同答案，所以訪問到嘅內容始終有限。

歲月不饒人，今次近距離見到安室，發現佢真係比起3年前差咗唔少，加上可能記者會前一晚夜遊中環，所以睇到佢狀態真係麻麻，希望出年演出時會好返。其實大家唔使太擔心，事關安室話每次演唱會前2個月就會開始做準備，到時就會操返fit。好多歌手演唱會前會好在壓力，而安室訪問時亦同大家講下自己點樣減壓。「我會盡量食鍾意嘅食物，同埋用多啲時間瞓覺，放狗去亦可以relax得到。」

其實呢個「namie amuro LIVEGENIC 2015-2016」演唱會9月已經喺日本做過，今次香港站就會有新專輯《_genic》內同初音合唱嘅《B Who I Want 2 B》「今次合作就好似一次係一個冒險咁刺激，我會盡量將日本舞台搬嚟香港演出，希望大家喺2小時嘅出入面都可以有開心時刻。」咁即係有冇機會同初音同台演出先？大會就保持神秘唔公開，而且票價亦未有消息，只係知道CitiBank信用卡喺12月14日開始有得優先預購。

今次就同初音合作，而上次又同蔡依林crossover，咁有冇機會同香港歌手合作下先？「暫時未有人選，而且仲等緊機會，希望出年可以啦。」咁樣答唔通係咪暗示出年又會嚟香港呢？今次安室嚟香港，佢嘅監製西茂弘繼續跟到實，而且訪問期間安室不時都會同佢打眼色，關係應該非比尋常，而問題到下張專輯幾時推出，安室就話會喺巡迴之後就積極籌備，計劃出年就會推出。

唔知點解每次有外國明星嚟香港，都一定有人問佢食咗啲乜，要例牌答案都係話好鍾意食點心，聽都聽到有啲悶。雖然安室都一樣，但得意在一邊笑一邊用廣東話講「飲茶」，笑完之後人都精神返少少。

除咗點心呢條必問問題之外，基本上佢每次訪問都會被問會唔會出個人品牌，而每次答案都係有可能，今次亦唔例外。不過講到著衫心得，安心就話平時盡量簡約打扮，同埋以黑白配搭為主。至於今次活動同演唱會就會由形象顧問負責，不過當日著Chanel秋冬裙襯同大串頸鏈，開過fans都話搞到安室睇落有啲老，而且一致認為紅色唇膏呢個妝出晒事。

其實安室今年都已經38歲，已經唔係當年嘅《SWEET 19 BLUES》青春妹妹仔，而講最多人識佢嘅歌，應該係收錄喺《Concentration 20》嘅「CAN YOU CELEBRATE?」，令佢喺香港吸引唔少fans。至於佢嘅新單曲「Red Carpet」就會喺12月4日推出，唔知各位fans又最鍾意邊首歌呢？