天文台話今日最低氣溫得3度左右！傻的嗎？！3度呀！除咗小朋友之外，其實大人都好應該要留喺家中囉！但鬼叫我窮呀頂硬上，3度一樣都要冒住凍死嘅危險出門返工，唯一可以做嘅保護措施，就係著多N件衫同埋黐暖貼。

但有冇巴絲打發覺，有時就算著幾多衫，感覺都係唔夠暖，究竟問題出喺邊呢？網上就有人教路，其實保暖要保得夠warm，一樣有技巧，唔係求其攬晒啲暖笠笠嘢上身就得架。

著衫技巧︰
好多人以為著多幾件衫就會夠暖，但如果唔識著，著20件都仲覺凍。相反，識得著，可能3-4件已經夠晒暖。咁衫應該要點著先保暖呢？

首先著1-2件heat tech
然後著貼身嘅衣物
跟住再到面衫
最後著外套

依照呢個次序著就最保暖。因為就算你件衫本身幾厚身都好，如果唔夠貼身，一樣會有空氣流入衣服內，令你覺得凍冰冰，所以一開頭一定要著貼身衣物包到實，如果唔係，件衫太鬆幾厚都係假，一樣會搞到唔夠暖。

著褲技巧︰
男士基本上一年四季都著牛仔褲，但其實冬天著牛仔褲都幾凍，因為牛仔褲一樣透風，加上呢期落雨，濕咗嘅透風牛仔褲真係諗起都覺得凍！咁凍嘅日子，想雙腳都暖就要揀防風嘅褲，例如行山褲。

戴手套技巧︰
天氣太凍嘅時候，發覺戴咗手套雙手都仲好凍，可以試吓喺手套內，再戴返對食炸雞時用嘅透明膠手套，聽講咁樣戴，對手會暖好多。