人人體質都唔同，有啲人一撻落床就即刻瞓到死豬咁，叫極唔醒，一覺瞓到大天光；但有啲人就偏偏相反，喺床度典嚟足成個鐘都瞓唔著，好難得瞓著又會小小事成日醒，瞓咗成晚都好似冇乜點瞓過，結果第二朝太攰唔知醒，成日懵盛盛，影響工作表現。

如果你係第一種體質，真係恭喜晒，因為想有覺好瞓真係唔容易。Mean娜就屬於第二種體質，成日都瞓得好差，所以經常尋求令自己好瞓啲嘅方法，今次就畀我搵到瞓覺前嘅注意事項，希望多少可以改善睡眠質素啦。

大家都知道咖啡因有提神作用，所以想容易瞓著，瞓覺前幾個鐘都盡量唔好攝入咖啡因，一來會影響睡眠質素，二來都會影響第二日嘅精神狀態。另外如果真係成日失眠，可以試吓瞓覺前飲適量嘅紅酒，除咗可以放鬆個人易瞓啲，小酌紅酒仲可以降低心臟病以及中風風險，仲可以增加骨骼強度。不過要注意唔好飲太多，太醉一樣會瞓唔好架。

瞓覺時最好避免思考，雖然好困難，但如果瞓前仲胡思亂想，就會令人愈諗愈清醒，好難瞓得著。建議瞓覺前一個鐘開始調整自己嘅思緒，等個人身心都冷靜落嚟，個腦慢慢放空，等心情穩定就會好瞓好多。

好多時瞓得唔好，臨天光先完全熟睡，結果起身時就唔知醒勁難離開張床。雖然好多人為咗有覺好瞓，會用用窗簾阻擋任何光線，但其實如果間房完全唔透光，反而冇辦法令你意識到已經天光，係時候起身，就好似要你半夜瞓瞓吓夾硬起身，自然辛苦好多啦。

好多人都會驚較得一個鬧鐘冇辦法即刻醒到，於是提早時間，每隔一段短時間就較一個鬧鐘，但其實咁樣間斷小睡並唔會好啲，因為提早嘈醒咁多次，會影響睡眠，加上當下好好難可以瞓返，所以與其提早被騷擾又瞓唔好，不如完整啲一次過起身好過。