一邊睇波，一邊嘆啤，人生一大樂事也，如果身邊有美女相伴，更是夫復何求！有份工可同一時間滿足你頭兩個願意，而且唔係義工，仲有錢收，有冇興趣做？

吓？香港人一定諗，有冇咁大隻蛤乸隨街跳，有呀，真是有咁大蛤乸呀，未睇完呢篇文，你先買定英國機票先。呢場係英超聯賽，唔係足球，而係欖球，戲碼是Bath Rugby對Bristol Bears，但呢條計唔係兩隊波度出來，而係蘋果酒商Thatchers Cider。

淨袋200鎊

蘋果酒，又西打酒，呢壇嘢其實是廠商的宣傳手法，招聘熱血人士做兼職「試酒師」，順便入場睇波，報酬極之吸引，只需數小時，便可獲得200鎊收入，即2000港元左右，收入大過付出，好搵過書展(筆者做過最高薪是連佣金一日1500元)，期間任飲，兼可免費睇波，爽到無朋友。

放心，絕無欺騙成份，條件寫得非常詳細，獲聘者需要在公眾入場前半小時，亦即比賽日早上10點半前抵達球場，確保該品牌已在球場內有售，然後試一試味道如何，報告一下。那場比賽的開波時間是下午2點，如果唔覺意飲得太多，仲可以嘆完後瞓一瞓，之後先全情投入欣賞大戰。

報名要快手

唔止呀，「試酒師」賽後可直落參加附近舉行的粉絲狂歡，晚上繼續吃喝玩樂，話唔定可以識到當地美女。講到明係兼職，梗係要同你講條件，應徵者必須年滿18歲或以上，兼且廠商仲怕你酒後駕駛，屆時獲聘者必須攜同友人入場，證實賽後有人代駕，熱愛飲酒和欖球者優先。

說到重點中的重點，呢一刻你仲可以報名求職，中籤者可於3月19日獲得確認信，心動不如行動，仲可以當是單日working holiday？利申，筆者唔係賣廣告，但就做埋資料搜集，知道球場位於英國倫敦西南部，可容納超過8萬人，氣氛不下於英超足球比賽，如果你真係成為幸運兒，希望回港後同Menclub寫返個「賽後報告」喇喂！