不知何時興起，主動離職的員工(相信唔會有人被炒魷都派掛？)在last day要派散水餅。時至今日，派散水餅已成為潛規則，唔派唔係唔得，但會被人覺得你無禮貌，唔識感恩囉。Okok，既然要派，就唔可以馬虎了事，最好仲要派得有用！

選擇合適時間

一般來說，派散水餅最佳時間是放工前兩至三小時，即大約下午4 – 5點，既可配合同事午餐過後努力工作了一段時間，來到tea time是時候鬆一鬆，而距離放工尚有兩三小時，有足夠時間派餅，唔使同事等，並且仲可以閒聊幾句，唔使派完急住走。不過，事前要留意上司、同事會否在這天有工作在身要提早放工，如有，可先向他們派餅，顯示你的細心。

論資排輩去派

派餅係一種心意，同時也是一種攻心計，除非你轉行，否則在職場上好來好去實無衰。所以，無論你對你老細、上司或如何怨恨也好，既然是最後一日，場戲都要做埋佢。派餅時緊記要先派俾老細、上司，答謝他們的照顧，說不定日後山水有相逢，都唔會面阻阻。其次，就是工作上幫過你，但又唔係好熟的同事，反而最好傾的同事可以最後派，因為做得好同事，就唔會計較這些門面野。

夾上自己公司的資料

如果辭職後打算創業，並且早已有全盤計劃，派散水餅可是最佳宣傳渠道。不妨買多一點，連平日較少合作的同事都派，但派餅唔係派完就算，要向同事透露自己的創業計劃，最後附上一張卡片或精明貼紙，印上自己公司的資料，天知道日後他們會是你的客戶呢？

揀適合的散水餅

普普通通派散水餅，同事們多半食完就算，唔會記得你，如果想對方記得你，保持聯絡，建立人脈，最好揀選有特色的散水餅，唔好再買西餅、蛋撻之類食完咩都冇，花多少少錢買些獨立包裝的曲奇、cup cake、朱古力、茶包等，製作精美又有紀念價值，才不失散水餅的意義。