Airbnb於今年8月秘密申請於美國納斯達克交易所上市，到美國時間週一時終於首次公開公司業績報告，除咗首次令公眾理解佢嘅經營情況，更仔細地顯示出疫情對旅遊業嘅衝擊。

據Airbnb公佈嘅財政報告，今年第三季盈利為2.19億美金 (下同)，收入為13億美金，上年同期跌18%，但對比第二季嘅收入僅為3.34億，蝕5.75億美金嘅成績，已經係今年最好成績嘅一季，同時Airbnb亦比同類公司例如Booking.com (同期收入跌48%)及Expedia (同期收入啦跌58%)要好好多。

雖然第三季有起色，但睇哂今年前三季，Airbnb收入由上年同期嘅37億減到25億 (跌32%)，淨利潤亦由蝕3.2億加大至蝕近7億。而且Airbnb預計疫情會於第四季再次爆發，相信第四季業績只會更差。

Airbnb 創辦人 Brian Chesky

圖片：Wikipedia

而第三季業績之所以變好，除咗因為疫情曾經稍為放緩，更重要嘅係頭兩季蝕到PK嘅時候Airbnb已經推出一系列救急行動，包括5月時炒咗全公司1/4員工、暫停一切宣傳支出、停止聘用新員工等，更重要嘅係為咗保持盈運資金，Airbnb先後兩次向銀行及其他投資者貸款總共20億美金，而其最新估計市值已經由曾經嘅310億「斬半」到180億。

圖片：Wikipedia

至於點解Airbnb喺條數咁差嘅情況下都要上市呢？其中一個原因係作為一間初創企業，Airbnb曾經接受如Amazon舒辦人Jeff Bezos等嘅投資，而呢啲投資者都希望Airbnb上市集資後能夠將股權變現；另一邊廂，唔少Airbnb員工亦曾經收到Airbnb嘅期權作為獎賞，問題係如果間公司唔上市，期權就冇鬼用，而呢堆期權又會於2021年初開始到期，所以Airbnb內部亦有上市壓力。

但另一邊廂，投資者亦要留意Airbnb嘅盈利能力，因為雖然虧蝕每年收窄，間中亦有賺錢嘅季度，但Airbnb係未試過年尾埋單有錢賺 (17年蝕7億、18年蝕17億、19年蝕6.7億、今次未知蝕幾多但肯定係蝕)。

資料來源：Business Insider、NY Times