荷里活近年鍾意翻拍、重啟都唔係啲咩新鮮事，而呢啲翻拍、重啟作唔好睇就更加唔係新鮮事，不過大部份原作導演最多都係扮睇唔到，甚至有唔少人會出黎幫手宣傳，好少可會直接開口鬧。但近日有指Disney+打算將經典嘅《Home Alone (寶貝智多星)》系列重啟，就惹黎原作頭兩部電影嘅導演Chris Columbus直線抽擊。

Chris Columbus與Macaulay Culkin

早於8月時，Disney就表示會重啟多個合家歡電影系列，放於Disney+上播放，其中就有《Home Alone》。而Chris Columbus近日因為要宣傳Netflix新戲《聖誕急救隊2 (The Christmas Chronicles 2)》而接受《Insider》訪問，當中就被問到對於Disney重啟《Home Alone》嘅睇法，而佢就非常直接咁話：「冇人就呢件事聯絡過我，而我覺得佢哋根本就係浪費時間！做咩啫究竟？我深信好似《Home Alone》呢啲壽命咁長嘅電影係唔可以重製，你唔會可以再做多次奇蹟出黎，根本就唔會Work，咁你做黎做咩啫？」

「咁就好似畫一部跟足Disney動畫嘅戲——即係啲真人版呀。究竟整黎有咩謂？有人做過啦，你諗啲新嘢黎做啦！就算最出黎仆到直你都算係整咗啲原創出黎呀！」

不過無論如何，重製版《Home Alone》已經於製作當中，將會由《Party無限耆 (Dirty Grandpa)》嘅英國導演Dan Mazer執導。據說劇情亦會有所修改，將會講述一個小朋友從一對夫婦手上偷咗某啲嘢後，夫婦們試圖從小朋友手上搶回該物件。