如果唔計餐廳唔開，疫情對全球人類最大嘅影響，可能係多咗WFH嘅時間，甚至連出名打風都要死返工嘅日本人都開始實施WFH。問題係呢個影響對大家黎講係正面定負面？特別係當成家人朝見口晚見面，係會更加融洽定家嘈屋閉？日本求職網站Adecco早前就做咗調查啦！

圖片：adecco via IT media

Adecco早前訪問咗759名每週在家工作3日或以上、年齡介乎20代至50代嘅日本上班族，調查在家工作對其配偶或同居者關係嘅影響。結果發現，有超過八成認為在家工作令佢哋與伴侶嘅關係變得更好，其中有近3成人認為關係變好嘅原因係「多咗溝通」、28%人認為「陪家人嘅時間多咗」，而「喺屋企感覺更加安心」以及「能夠幫手做家務」就分別有18%及15.3%。大概係因為與伴侶、家人關係變好，所以超過七成 (76%) 人亦表示，如果可以嘅話，未來都會繼續保持目前嘅WFH頻率。

至於嗰17%認為WFH令佢與伴侶家人關係更差嘅人之中，有48%都指原因係「自己一個人嘅時間變少咗」，而「屋企好多瑣碎嘢煩」、「電話及開會聲太嘈」、「要幫手做家務」、「間屋好亂」等原因都有大約10%人指出。

圖片：adecco via IT media

調查亦問到「在家工作嘅最大難處」，當中有超過一半人都話在家工作會令電費、水費增加，其次就係「屋企冇位做嘢」以及「冇咗工作同返屋企嘅分別」。值得留意嘅係，64%受訪者都表示，公司並冇因為員工在家工作而提供額外津貼——係呀，日本人WFH係問緊有冇補貼，而香港人WFH係問緊「可唔可以唔扣糧。」