日前英女皇發表聲明，收回一年前執意要去美國發展嘅薩塞克斯公爵哈里王子以及其夫人梅根嘅一切榮譽頭銜，結果哈里夫婦竟然出聲明駁咀，傳聞就令哈里哥哥威廉感到非常失望及震驚，覺得細佬完全冇尊重嫲嫲。

卻說日前英女皇發表聲明，指證實哈里夫婦不會再履行英國皇室義務後，決定收回由英女皇頒發、兩夫婦之前擁有嘅榮譽軍階或者頭銜，當中包括英格蘭橄欖球聯合會、橄欖球足球聯盟與倫敦馬拉松名義贊助人、大英國協大學協會名義頭銜等，相關頭銜會再分發予其他皇室成員，換言之哈里夫婦將會係「簡簡單單」嘅公爵及公爵夫人，亦即係勉強算係一家人。

而哈里及梅根隨即發佈簡短聲明，指「服務是全球性的」，外界理解為「係美國發展咪又係咁做」，暗寸英女皇小器。

據報，正正就係呢個回覆令哈里嘅哥哥，極有可能成為下屆英皇嘅威廉王子非常不滿。據知情人士指，威廉王子聽到消息之後感到「非常傷心及震驚」，亦認為哈里夫婦嘅行為「侮辱性兼不尊重」，「你唔會回應女皇，根本唔應該」。但嬲還嬲，消息人士指威廉王子心底裏依然愛錫細佬，並認為隨時間過去，至少兄弟之間嘅感情能夠修復。