{ SKIP }
文:MenClub 艾力克  
POSTED ON 23 Mar 2021

就喺2021年3月11日,數碼藝術家Beeple一張JPG作品《EVERYDAYS: THE FIRST 5000 DAYS》透過藝術品拍賣行佳士得(Christie's),成功以$6,930萬美金(約$5.4億港幣)出售。是次拍賣令Beeple一夜之間成為當今世上第三高身價藝術家,僅次於POP ART之王Jeff Koons、風景畫大師David Hockney,同時亦顛覆傳統藝術拍賣市場。但你又知唔知佢未接觸NFT之前,大部份作品都賣唔超過100美元...

Beeple本名為Mike Winkelmann。(圖片截自:Beeple個人網站

現年39歲嘅Beeple本名為Mike Winkelmann,畢業於Purdue University,主修Computer Science,同時係兩位小朋友嘅爸爸,太太係一名老師。起初就同大部份IT類畢業生一樣,只係幫啲公司寫下網站,並未受過藝術訓練,直到有一日見到一位英國藝術家因每日畫素描畫而成名,佢就從2007年開始透過軟件Cinema 4D開始創作《Everdays》作品集,就係每日畫一張圖再upload上網,足足持續咗14年。

《Everdays》已經持續咗5075日。(圖片截自:Beeple個人網站

《Everdays》起初只係一啲速寫作品,經多年演變後成為數碼藝術作品,創作風格以抽象、超現實及荒誕為主,近年更結合社會時事議題以諷刺手法創作出別具幽默感嘅作品,特朗普、金正恩、Michael Jackson同Facebook創辦人Mark Zuckerberg都成為過佢筆下嘅創作材料。現時佢Instagram帳號共有209萬人追蹤,各大知名品牌如LV、NIKE、Apple,更甚至著名歌星Eminem、Justin Bieber、Nicki Minaj、Katy Perry都同佢合作過。

(圖片截自:Beeple個人網站

Beeple曾坦言,喺佢未接觸NFT之前作品好少賣得超過100美元。不過自從佢喺上年10月起開始知道有樣嘢叫NFT,就抱住試水溫嘅心態將一段名為「POLITICS IS BULLSHIT」嘅數碼作品放上NFT交易平台Nifty Gateway出售,限售100張,每張價格1美元,點知好快就被一搶而空,從此展開佢嘅NFT之路。其後佢喺上年12月嘅一場拍賣入面,短短一個禮拜就賣出總價值達350萬美元嘅數碼作品。

接著就係文章開頭所講嘅天價拍賣事件,是次網上拍賣由NFT交易平台MakersPlace同佳士得合作舉辦,與此同時亦係佳士得第一次用加密貨幣「以太幣」交易、第一次有傳統拍賣行拍賣無實體品物嘅NFT藝術品。拍賣最終以天價$6,930萬美金(約$5.4億港幣)成交,顛覆傳統藝術拍賣市場之餘,亦引起金融界人士關注。

《EVERYDAYS: THE FIRST 5000 DAYS》

早排佢接受外媒Fox News訪問時表示,覺得當日拍賣非常超現實,至今而仍然唔敢相信,見到拍賣價格從2700萬美元升到5000萬美元以上嗰陣,就好似有炸彈喺房爆炸一樣。對於外界有唔少人指NFT藝術品係泡沫,Beeple亦認同。佢將NTF同互聯網早期發展比較,提到2000年代科網泡沫,當時互聯網剛普及,令到同唔少科網公司水漲船高,最後結果係點大家都知,提醒大家要知道加密藝術有機會變得一文不值。

NyanCat作者Chris Torres認為,NFT能夠確保藝術家能從轉手交易收取版稅。

不過從另一個角度,Beeple認為NFT出現可以為數碼藝術家收入同生涯帶嚟正面影響。按照現時加密藝術品不明文行規,創作者就算賣出數碼作品NFT,其後每次交易都可以獲得10%版稅,從而為藝術家提供「可持續收入」。例如藝術家A用$100賣一幅作品畀先生B,而先生B之後以$200再賣畀先生C,藝術家最後總共收到$100+$20=$120收入,如果之後C再賣畀其他人,藝術家A都能夠每次收返10%版稅。另外,藝術家仲可以將自己嘅數碼作品分拆成多個NFT,例如將一幅畫分拆成100個NFT賣比唔同買家,實行多人共享同一件數碼作品。

早前有班加密藝術家燒毀Banksy作品,希望引起大家關注NFT。(圖片截至:Youtube)

Beeple另外亦表示,NFT嘅出現將藝術家同收藏者形成一種特殊關係。因為收藏者買個位藝術家嘅作品(NFT)無論出自欣賞定係投資都好,件作品(NFT)之後嘅價值取決於藝術家名氣。當藝術家之後名氣愈大,之前所買落嘅作品(NFT)價值亦會隨之而升上,同時按照上一段所講嘅10%版稅,作品(NFT)價值升上對藝術家本身都有好處,最終令藝術家同收藏者都「坐喺同一條船」,大家都會想藝術家保持創作同獲得更大名氣。

(圖片截自:Beeple個人網站

最後,無論大家認唔認同運用NFT技術嘅加密藝術都好,NFT嘅出現確實對藝術界及金融投資界帶嚟嶄新變化,數碼藝術家能夠從中開拓新銷售渠道,令數碼創作得到肯定及認可,為藝術歷史展開新嘅一章。

資料來源:Beeple個人網站niftygatewayesquirebusinessinsiderbloomberg
一直以嚟美國都係最多億萬富豪嘅國家,近年中國開始逐漸趕上。根據《福布斯》最新全球億萬富豪排行榜顯示,北京首次超越紐約,成為最多億萬富豪城市。報告亦提到,即使疫情打亂全球經濟,但億萬富豪榜人數仍然破記錄 ...
powerandmoney
【厲害了】北京首次超越紐約 成為最多億萬富豪城市
08 Apr 2021
呢一年因為各種原因大家都少咗出街,網上購物亦隨之盛行起來,相信大家對於足不出戶就能夠買到一切生活所需都非常滿意。而要令到大家更加滿意,相信就係足不出戶買到所有生活所需之餘,每次買嘢仲要有回贈!如果你都 ...
powerandmoney
【著數】全新livi Debit Mastercard 網購即享8%*現金回贈!
29 Mar 2021