相信有留意開建築設計嘅朋友，對Zaha Hadid呢個名絕對唔會陌生。佢以前衛特建築風格成為首位獲得普立茲克建築獎嘅女性建築師，更被譽為當代解構主義大師，多項著名建築都出自佢嘅手筆，例如香港理工大學創新樓、澳門摩珀斯酒店、北京市銀河SOHO等等。雖然Zaha Hadid喺2016年因心臟病隕落，但其事務所Zaha Hadid Architects（簡稱ZHA）繼續承傳佢嘅創作精神，其中一項新作「珠海金灣市民藝術中心」現正動工，大家不妨先睹為快。

呢個位置珠海金灣市嘅藝術中心，總共由四個則翼組成，每個則翼分別係美術館、科學中心、擁有1200個座位嘅劇院、以及擁有500個座位嘅多用途大廳。場館以兩大兩小則翼對稱排列，並透過中間嘅公共空間串連，再由兩座行人天橋連接到對岸。

（渲染圖來源：Minmud）

據ZHA解釋，建築設計靈感嚟侯鳥飛向中國南方過冬嘅「人字型」隊例，唔同嘅構件組合形式可以因應建築功能而變化。

兩座行人天橋可以將觀眾引導到中間嘅露天公共空間，自然光能夠從中間穿過照亮4個則翼。

近年中國興講環保，所以呢個項目都有唔少「綠色」元素。場館外殼設計採用大小不一嘅「格仔」組成，為結構內嘅雙層隔熱玻璃保護，並有充滿「洞洞」嘅鋁板進一步阻隔陽光。「格仔」外殼設計能夠因應太陽光唔同嘅照射角度產生唔同程度嘅進光量，從而減少室內溫度，咁就可以唔使開咁勁冷氣。另外，建築透過特別設計能夠將70%以上嘅雨水通過水生植物過濾後再儲存使用，景觀系統亦設置咗濕度及土壤水份監測器，能夠減少灌溉用水量。