無論係港、日、台、韓定中，整個東亞地區似乎都有傾生意時會飲酒嘅「習俗」，久而久之就會有人覺得鍾意飲酒先係可以「成功」、「搵大錢」嘅關鍵。不過日前一班日、台、韓嘅學者就發佈咗一個新研究，指出一個人鐘唔鍾意飲唔飲酒，對佢嘅收入幾乎毫無影響。

卻說勞動經濟學中，曾有關於飲酒量與收入之間關係嘅分析 (結論係飲酒量與收入成正比)。但東京大學大學院公共政策部嘅川口大司教授，就發現有人天生好飲得，有人就天生酒量奇差，為咗進一步研究「飲酒」與「收入」與收入之間嘅關係，於是佢由2014年起搵黎韓國首爾大學經濟學部嘅李政珉教授、日本一橋大學大學經濟學研究科嘅橫山泉教授，再於2019年加入台灣大經濟學部嘅林明仁教授，進行咗一個關於「酒精耐性」與「收入」關係嘅研究。

所謂「酒精耐性」，其實係指人體分解酒精嘅能力，實際上即係人體內分解酒精嘅酵素量，而酵素量係透過父母遺傳而定。所以有人天生就好飲得，亦有人飲兩啖就會醉倒。研究團隊於日本、台灣及韓國分別召募咗2000、1000及500名年齡屆乎25-59歲嘅在職男士，先利用酒精貼紙測試佢哋嘅酒精耐性，結果發現有54%人屬於「高耐性」，其餘46%為「低耐性」。

隨後就對比「高耐性」及「低耐性」兩組人嘅收入。三個國家中「高耐性」人嘅平均月入為4311美金、「低耐性人」收入就係4288美金，兩者僅差23美金，於統計學無任何明顯不同。而工時方面，高耐性人一週工作約46.09小時，低耐性人則工作46.37小時，同樣無統計學上嘅差別，所以不存在「唔飲酒嘅人花更多時間工作」嘅說法。同時研究亦發現「高耐性」人嘅每日飲酒量雖然為「低耐性」人嘅一倍，但實際上吸收嘅酒精只有28ml，甚至不足以令人飲醉。

簡單黎講，就即係會飲酒嘅人，其實唔係飲好多；而飲唔飲對收入亦冇咩影響。但點解之前會有研究指飲酒量與收入係成正比呢？川口教授表示，過去嘅研究只對比「飲得多嘅人」與「唔飲酒嘅人」嘅收入，但一個「飲得多嘅人」性格可能更加外向、經常要飲酒亦表示佢份工可能係收入較高嘅銷售人員，結果令「飲酒」與「收入」產生偽關係，實際上主因係性格及工種。

川口教授亦表示，研究反映出無論係「本身唔飲酒嘅人去飲酒」又或者「本身有飲嘅人飲多啲」，都唔會令收入增加。所以如果你唔鐘意飲，就唔好為收入逼自己飲；如果你本身鐘意飲，當係興趣就得啦。

資料來源：president.jp