四年一度的世界盃終於來臨，球迷們除左睇波湊熱鬧外，有部份更可能會稍為落注，考下眼光之餘，睇落又可多兩錢肉緊，一個唔該仲可能有橫財添。

有人賭就自然有人Tip，上屆南非世界杯就有德國章魚「保羅」，今年香港終於都有代表──你以為我講緊捧邊隊衰邊隊的香港燈神Lulu？你錯了，我講緊嘅，係一個叫「盛盤王」的FB 專頁！

呢個專頁聲稱自己有「十多年睇盤經驗…命中率特高，有證有據，無花無假」世界盃期間仲推出「$15,000 窮人優惠包月波膽」，以「機會係留給有準備的人…甘心成世挨？？做隻死窮狗？？…盤王大發善心，可憐窮人！做人做狗，自己決定！」作宣傳口號，加上成千個留言「多謝盛盤王」又話中左可以買樓買車，真係睇到我心仔都郁埋，差啲就入錢加入「做人」嘅行列！

之但係我唔賭波，當然我亦都冇比萬五銀佢黎「做人」，所以佢啲貼士係真係假我唔清楚。（註：經本日出版的週刊報道，盛盤王提供的貼士十四場只中一場）我只係覺得如果真係有辦法係馬會身上幾百萬、幾千萬甚至幾億咁贏返黎，我唔會有咁大方Share比人知；而如果我有咁大方，又唔會貪你嗰萬五銀喎。

所以，與其話佢大發善心，不如話佢係一門生意。有趣嘅，唔係呢門生意究竟做唔做得成，而係呢個「盛盤王」，究竟捕捉左人類嘅咩心態，而覺得可以成為一門生意？

以前睇《百萬富翁》，成日幻想如果比一百萬我可以做到幾多事情。當時的「一百萬」是一個遙不可及而又陌生的數字。今時今日的「一百萬」仍然是遙不可及，卻不再陌生。

當各方面生活必需的成本火速上升、以往的天文數字成為了慣常用語，我們的社會共同建立出「不要放棄任何（搵錢）機會才跟得上大隊」的思想。但無論你點努力，打份牛工肯定冇出頭；投資的本錢同風險又唔係每個人都承擔得起，我們有發財的心，卻沒發財之法。

黃子華係《末世財神》曾經講過，香港人要「發財」最好嘅方法就係「不勞而獲」，而宏觀整個香港，會定期為人民提供嘅「不勞而獲」發財機會的，就只有馬會。六合彩、賽馬和足智彩，就是一眾升斗市民一鋪改變現狀的唯一希望。但賭博始終是一個機率的遊戲，「有機會不勞而獲」和「有機會一無所有」，只是一個硬幣的兩面。

「盛盤王」正正捕捉到這種逼切感，它把自己包裝成「救世主」，將不肯定的「機會」化為實食冇痴牙的「將會」；它的生意並不是建基於世界盃的「波膽」，而是這個社會的「淒慘」。

 呢個社會的「淒慘」越濃厚，類似的產品就會越多。既然循正途看不到能有出頭之日，旁門左道就成了另一選擇。膽大的也許會創辦一個類似「盛X王」的手法，以消費人家的希望為生；膽小的就只好成為被消費的一群。

話雖如此，成個Page有一句野我就非常認同:「做人做狗自己決定」。跟佢買贏唔贏到幾百萬我唔知，但係呢個說話同樣適用於近日在香港發生，涉及1200億港幣的某件事情。

做人定做狗，自己決定啦！