英超球隊熱刺今季戰績大幅下滑，上季英超排名第4嘅佢地12戰過後竟然只係排名第14位，與榜首嘅利物浦足足有20分差距。因此，今日熱刺宣佈將教練普捷天奴辭退，並盛傳「寸王」摩連奴將會入主。

上季嘅熱刺喺普捷天奴帶領下，除左於英超排名第四外，於歐聯更成功打入決賽，只係僅敗於同樣黎自英超嘅利物浦腳下。對於球隊黎講，上季雖然同樣都係四大皆空，但無疑算係成功嘅一季。可惜嘅係今季熱刺卻無以為繼，表現插水式下跌，英超12戰過後僅錄得3勝5和4負，排名第14位，距離降班區都只係多出6分而已。

Club statement

— Tottenham Hotspur (@SpursOfficial) November 19, 2019

而為了一改目前走勢，熱刺決定今日宣佈將領隊普捷天奴辭退，呢位47歲教練於2014年入主熱刺，並將球隊打造成一支具有爭冠能力嘅球隊，如今被炒實在令人感到可惜。而普捷天奴被炒後，盛傳前曼聯領隊摩連奴將會入主，甚至有消息指雙方已經達成共識，只欠最終落手簽名。

不過唔少人都替熱刺擔心，因為摩連奴嘅領軍方法與普捷天奴非常不同，前者可以短期令球隊戰力提升，但大多是以收購球員來即插即用，與後者懂得培養球員岩岩相反，因此會令熱刺本來已經建立嘅文化完全廢除。不過凡事都有兩面，只能夠祝福熱刺好運了。