南華足球隊本來貴為為香港球圈班霸，但因為球隊內部問題最終決定「自降」甲組，而隨後有關其足球隊嘅消息亦變得少之又少。咁點解今次無啦啦要提佢呢？原因係目前「少林寺」嘅一位球員葉頌朗，正職為警察嘅佢於比賽中踢茅波被兩黃一紅，其後現場人士大罵「死黑警」。

喺過去嘅週日，南華與北區進行一場甲組比賽，最終北區以3:0大炒南華，而今場南華大敗嘅罪人絕對要數中場葉頌朗。今仗葉頌朗傳球頻失，其中第一個失球因為佢嘅犯規領黃下，北區快開罰球而射入，然後第二個失球又係呢位中場直接將個波傳比對手而失的。

唔單止因為表現差而令南華失球，葉頌朗亦因為踢茅波犯規侵犯對手，最終被球證兩黃一紅驅逐離場，令球隊打少一人。而被逐離場下，場邊有人歡呼並大罵呢位正職為警察嘅中場「死黑警」，原來罵聲係黎自北區後備席嘅球員。

對於有人鬧自己嘅球員，南華主教練潘耀焯即使回應：「喂，踢波還踢波啦！」但現場南華球迷亦回應：「比佢抖下啦！」

目前作為見習督察嘅葉頌朗，係2009年香港奪得東亞運金牌嘅隊員之一，而此前作為全職足球員嘅佢就分別效力過傑志、南區、元朗等等。不過其後退役結束足球員生涯並投考警察，其後於反修例運動中呢位前港腳於網上斥責示威者：「你哋係一群趁機攪事嘅垃圾，暴徒，唔好再口口聲聲話代表香港人，你哋唔配做香港人。」

有網友就指出葉頌朗當日掛靴投考警察嘅原因，都係不外乎因為個人實力不濟，根本難以於港超立足，另外就係為左錢選擇更高人工嘅職業。另外，亦都有人點出，葉頌朗過去曾經參與佔中活動，但最終卻以「If you can't beat them, join them.」收場。