上年8月之後，唔知讀者有冇去過美國奧蘭多嘅迪士尼樂園？如果有，你會發現園內多了一個新園區──「NBA地帶」，更奇怪的是園區內絲毫感覺不到迪士尼元素，這種破格做法能否給香港一個參考呢？

迪士尼的吸金手法源自電影帶動遊客前往主題樂園消費，阿爸阿媽帶埋細路去，而細路哥長大後，又會帶自己的小朋友入園，代代相傳，循環不息，牢不可破，真係可以「打劫」幾代人的錢。

而過去幾年，迪士尼先後購入不少體育相關資產，雄心壯志發展體育市場。2017年，迪士尼花了短短一年時間，成為體育媒體龍頭ESPN大股東。另一邊廂，籃球並非美國最受歡迎運動，要更進一步，NBA便要劍走偏鋒，做人所不做，於是索性與迪尼士拍住上，在奧蘭多開設以籃球為主題的園區，也是迪士尼主題公園內首次出現「與迪士尼風馬牛不相及」的東西。花了5年，「The NBA Experience」於去年8月面世，如果取得成功的話，NBA肯定會贏在起跑線，比NFL、MLB和NHL更早贏得美國青少年歡心。

奧蘭多迪士尼每年入場達6260萬人次，約為NBA上季總入場人次的3倍，而且過夜客不計其數，園內已經預留位置給籃球慶典活動，非常有遠見。這園區有13個不同活動，會令你有置身NBA球場的感覺，以假亂真，就連播放精華的大銀幕、燈光效果等都跟足NBA設計，更有選秀會等不同環節，但跟其他園內區域不同，當你走進館內，是不會見到米高老鼠、唐老鴨等卡通人物。

迪士尼加NBA，不論對NBA迷或者普通遊客來說，吸引力都不低，唯一要注意的，除了NBA園區不包括迪士尼人物，迪士尼門票也不包括NBA園區，大人細路都要額外收費，成人每位盛惠34美元，兒童每位29美元，較睇一場NBA更抵，也低於一張正價樂園門票。

套用到香港的情況，政府逢旨叫港人捱義氣，海洋公園經營不善就可注資100億救亡，話唔定遲就輪到迪士尼。但是，「武肺」打到嚟，官員做事永遠是是旦旦，封關都拖到「冇乜太大意思」，你話啖氣點吞得落？

老實講，香港運動員大都形象正面，單車、羽毛球、劍擊、田徑甚至港超都可以考慮帶入主題樂園，設特別專區，更可搵英雄輝、江旻憓、楊文蔚等做埋代言人，除了吸引遊客之外，好處實在也不少。其一，本地運動員的身價不高，選擇又多；其二，又可向世界旅客介紹本地運動員，令大家知道佢哋唔係「臘鴨」；其三，就算以「發展體育」為由，向政府攞錢也合情合理得多，何樂而不為？