{ SKIP }
文:MenClub 波特先生  圖:互聯網
POSTED ON 14 Jul 2020

香港想打入世界盃好似天方夜譚嘅事? 但做人無夢想同條咸魚有咩分別呢? 將夢想實現呢件事你唔覺得好熱血咩? 而要想成事,就要有計劃有配套,而近日香港球會傑志就宣佈舉辦「傑子尖子計劃」,放眼2034年嘅世界盃!!

傑志日前宣佈,為 「香港2034」成立「傑志尖子計劃」,呢個計劃係全港首個為青少年球員提供系統性足球及體能訓練嘅計劃,通過長期及具規劃嘅職業化操練,希望可以培育出亞洲級以至世界級嘅足球員,令佢成為2034年香港隊嘅主力,嘗試帶領香港隊殺入世界盃決賽週。

「香港2034」呢個組織係由傑志倡議的,佢為香港足球未來發展訂下清晰藍圖,其中包括:青訓規劃、成立超級青年聯賽等,同時計劃亦已被採納成香港未來五年足球發展計劃嘅重點項目之一。

由新學年開始,「傑志尖子計劃」每年會讓全港所有中學生報名參加,而今屆將會從中挑選近50名最具潛質嘅中一至中四青少年,為佢地提供每周三課(16:00-18:00)嘅全面職業化足球訓練,主要強化年輕球員基本功,比佢地打好技術基礎。預計此計劃將會喺未來兩年擴展至涵蓋整個中學教育階段,為香港足球代表隊培育新力軍,以打入2034世界盃決賽週為終極目標。參與計劃嘅精英球員可在所屬球會青年軍或區隊訓練及比賽以外,接受更多時數嘅足球訓練,以「10年10,000小時專業訓練」為指標。

「傑志尖子計劃」完全唔使錢,但卻由擁有豐富青訓經驗嘅傑志專業教練團隊任教,其中包括朱志光、梁志榮、金東進、裴鋕垣、羅拔圖、尹東憲和高文等等。除左足球技術外,體能操練亦會加入其中,再配合註冊營養師為學員設定餐單,以培養飲食紀律,提升表現。

真心希望傑志今次計劃可以成功,令香港足球殺出亞洲,奇蹟殺入世界盃決賽週!

今次係世錦賽過去8年嘅首桿147!
sports
【世錦賽】希堅斯生涯第10杆147,可惜仍要出局!
07 Aug 2020
真係一代新人勝舊人~~~
sports
【身價漲跌】日本小將久保健英身價已超G.巴利
05 Aug 2020