疫情第N波又開始，又只可以4個人同檯食飯、落球場打波又話要戴返口罩，其他大型活動睇黎都唔使搞——但國際奧委會會長Thomas Bach近日就實牙實齒、截釘截鐵咁話，「奧運會」呢個地球上其中一個最大型、聚集最多人嘅活動，出年一定會搞得成、而且一定會有現場觀眾！

據《BBC》報導，Thomas Bach近日飛去咗去日本，與日本首相菅義偉、東京奧組委主席武藤敏郎、日本奧運相橋本聖子等人會面，商討如何確保已經延期一年嘅東京奧運能夠順利舉行。事後接受傳媒訪問時Thomas Bach就話「我哋會將所有想像得到嘅措施都放哂入黎，所以我哋非常、非常有信心下年奧運能夠有現場觀眾入場。」另外BThomas Bach亦有提到會「如果到時疫苗已經面世，運動員同觀眾都必須打咗先可以去日本」。

圖片：Wikipeida

聽落去，所有參加奧運嘅人都要注射疫苗，理應係個唔錯嘅辦法，但實際執行就相當有困難。先唔好講目前最有機會成功嘅輝瑞疫苗亦未進入量產階段，就算量產咗都係全球一齊爭，再加上物流問題 (要保存於-70度以下)，要所有觀眾都打過疫苗先可以去日本入場睇奧運，似乎就有啲太過樂觀。不過BBC同時亦引述多位東京奧組委成員，指「不計成本」下年東京奧運都一定要搞得成。或者日本方面會搞個「睇奧運送疫苗」嘅優惠？