早前C朗（Cristiano Ronaldo）就因為喺歐國盃記者會移走贊助商兩支可樂，高呼大家飲多啲水，而成一時佳話。同時令之後嘅普巴（Paul Pogba）同盧卡迪利（Manuel Locatelli）都有樣學樣，先後移走贊助商飲品，搞到UEFA忍唔住口出聲警告球員唔準再咁做。不過今次意大利功臣邦路斯（Leonardo Bonucci）就做出「正確」示範，喺賽後記者會拎起贊助商啤酒同可樂各飲一啖，並表示「I'll Drink Everything Tonight」，相當風騷。

（圖片截自：ESPN UK）

於今日稍早時間，倫敦溫布利球場上演咗一場驚心動魄嘅大戰。當中意大利中堅邦路斯絕對係關鍵人物，全靠佢喺67分鐘把握角球機會將比數追成1：1，意大利先有機會進入加時賽以及互射12碼環節，並喺12碼階段操刀第3輪一射入網，成功為球隊奪得今屆歐國盃冠軍。完場後邦路斯更立即喺鏡頭前大叫「It's coming to Rome！」嚟諷刺英格蘭球迷所講嘅「It's coming home」，仲要喺賽後記者會好風騷咁飲起啤酒同可樂，非常招積。唔知同樣係祖雲達斯嘅C朗睇到會有咩感受呢？