綜觀歷屆奧運，大部份得獎選手都鐘意影相嗰陣咬獎牌一嘗「勝利嘅味道」，如果咬自己塊牌確實無傷大雅嘅，話晒都係憑實力爭取返嚟。但日前名古屋市長河村隆接見壘球金牌選手後藤希友嗰陣，突然情不自禁拉低口罩一嘢咬落人哋個牌，呢個分「金」同味嘅行為瞬間嚇親唔少在場人士，事後亦遭到各界炮轟。

昨日20歲嘅壘球選手後藤希友返到家鄉愛知縣，接受到名古屋市長河村隆親自會見，期間後藤象徵式將金牌掛落市長條頸打算分享喜悅，點知河村隆講咗句「都幾重喎！」之後就拉低口罩一嘢咬落個牌，後藤嘅反應就真係「當堂嚇一跳，然後得啖笑」，但唔少日本網友就笑唔出啦，即時喺網上批評河村隆行為「失禮」、「唔衛生又噁心」、「唔尊重」。

之後河村隆嘅道歉聲明更為事情火上加油，佢當晚解釋「（咬金牌）是最高熱情的展現。如果造成了困擾，那我表示抱歉」，網友聽完當然唔接受，仲鬧多兩錢重。截至今日，名古屋市政府共收到3,137宗分別透過電話、電郵或傳真嘅抗議同批評。

え…
動画見たけど、「カンッ」て歯が当たる音なってるし????
自分の金メダルでも傷つかないように優しく扱ってるのに????
怒らない後藤選手の心の広さ凄すぎ????
俺だったら泣く。 https://t.co/lGhfHjB8BJ

— 高藤直寿TAKATO NAOHISA (@naohisatakato) August 4, 2021

期後，後藤希友所屬嘅豐田汽車亦表示「金牌係運動員長年努力嘅結晶，（咬金牌）係唔應該有嘅行為，未感受到敬意，令人遺憾」。

柔道男子60公斤級金牌選手高藤直壽就喺Twitter表示睇片都聽到牙齒碰撞獎牌嘅聲，並話「我哋對自己嘅金牌都會小心呵護，深怕會受到一丁點刮傷，後藤竟然完全冇嬲，真係心胸廣闊，換著係我一早就喊咗」。