前無古人完全無觀眾入場嘅東京奧運日前已經曲終人散，香港奧運代表隊取得歷史最佳戰績1金2銀3銅，令經歷接近兩年低谷嘅全港市民興奮無比。而8月24日殘疾人士奧運會將會接住奧運舉行，其中香港隊合共派出64人代表團，當中有24名運動員將出戰8個項目。

香港代表團24名運動員將出戰包括羽毛球、輪椅劍擊、射箭、田徑、硬地滾球、馬術、游泳、乒乓球，其中有一半運動員為首次參加殘奧，當中不乏奪標熱門，其中包括世界排名第2的「輪羽一哥」陳浩源、已經征戰左5屆殘奧嘅花劍代表余翠怡、硬地滾球代表梁育榮、游泳選手鄧韋樂及乒乓球女將吳玟薈，每一位都將會係香港嘅獎牌希望。

由於香港政府已經購買東奧播映權，當中已包括埋殘奧，所以各大電視台都可以免費播放賽事供市民收看，不過政府只係要求電視台每日播放殘奧會精華片段及直播殘奧會開幕禮及閉幕禮，亦即係話電視台並無義務直播其賽事，所以最終佢地會唔會播放賽事無人知曉。

過去殘奧會一向被外界所忽視，但今屆賽事與以往明顯有點不同，市民對香港運動員非常關注，預計今屆受關注程度將前所未見，當然各位市民一定要保持熱度，因為佢地都係代表香港嘅運動員，而佢地訓練花嘅努力絕對不比正常運動員為少，甚至花嘅準備時間會更多，所以值得全港市民支持佢地。

而有份參與殘奧會嘅港隊代表希望市民可以將奧運期間支持運動員嘅熱情帶到殘奧會，以同樣嘅熱度去支持香港殘奧代表。