曾兩奪奧運男子體操個人全能金牌、5奪世界體操錦標賽個人全能、兼帶領日本男子體操隊於2016年里約奧奪得男子體操團體金牌嘅日本體操名將內村航平宣佈退役。

圖片：内村航平/Kohei Uchimura on Facebook

1989年1月3日出生嘅內村航平，今日於個人官網中宣佈退役消息，並會於後日舉行記者交待詳情。內村航平成名於2008年北京奧運，當時佢拎到個人全能銀牌，並協助日本奪得男團銀牌，然後就開始統治個人全能賽場，於2009、2010、2011、2013、2014、2015嘅世界體操錦標賽都獲得金牌。2012年倫敦奧運首奪個人全能金牌，並協助日本隊再次獲得男團銀牌；2016年里約奧運衛冕個人全能金牌，並成功為日本男團奪得金牌，達至職業生涯頂峰。

圖片：内村航平/Kohei Uchimura on Facebook

但自2017年開始佢就受到傷患困擾。2017年因左腳踝受傷，中途放棄世錦賽資格賽；2019年又因肩痛而落選日本奧運男團選拔，最後於2020年初改為參加單槓單項，獲得參加東京奧運嘅資格。可惜於初賽中因失誤只獲第20名，無緣晉級，其後佢稱此次失誤為「一生悔狠」。值得一提嘅係，該屆奧運嘅男子個人全能及單槓金牌，都係由年僅19歲嘅日本小將橋本大輝奪得，頗有交棒意味。

內村航平最後嘅比賽，係去年10月於家鄉北九州參加2021年體操世錦賽，出戰單槓項目，雖然以「會心一擊」完美落地，但最後都只得第六名。比賽後佢就開始思考自己嘅將來，最後得出退役結論。

資料來源：Uchimura-kohei.com